La indita de Islandia

Gleðilega páska!

2009-04-12T11:24:00.004Z

Ótrúlegt hvað tíminn er fljótur að líða. Allt í einu eru komnir páskar og sumarið á næsta leyti. Ekki nóg með það að ég sé búin með ritgerðina sem ég hélt að ég myndi aldrei klára (allavega ekki með þeim hætti að ég héldi geðheilsunni) heldur er ég líka útskrifuð og byrjuð að vinna á fullu. Þegar ég byrjaði í lögfræðinni sá ég ekki fyrir endan á þessu blessaða námi og á tímabili var ég alveg ákveðin í því að hætta þessu bara því þetta ætti ekki við mig en ótrúlegt en satt þá hafðist þetta allt saman og nú get ég bara unnið eins og alvöru manneskja og þarf aldrei að fara í skóla meir.

Páskafríið hefur einkennst af almennri leti, lestri góðra bóka og handavinnu og ég notið þess í botn að vera ekki að vinna upp lestur í einhverju fagi eða að byrja próflesturinn. Helmingurinn af kvenfélaginu var með páskadinner í gærkvöldi sem var mjög vel heppnaður, sérstaklega sérlega páskatertan hennar Höddu sem var vel skreytt í tilefni dagsins :) Við systur ætlum svo að græja eitthvað gott saman í kvöld þannig að maður verður að passa sig að borða ekki yfir sig af páskaegginu stóra og góða :)

Gleðilega páska gott fólk, vona að þið hafið haft það gott í páskafríinu og njótið þess sem eftir er :)

Gleði, gleði

2008-11-30T23:14:00.013Z

Ekki svo mikil gleði í S5 þessa dagana - mæli ekki með ritgerðarskrifum ætli fólk sér almennt að halda geðheilsunni ;) En í staðinn fyrir leiðinlegt blogg setti ég inn nokkrar skemmtilegar myndir síðan á Þórshafnarballinu um daginn, þar var mikil gleði :)

Að taka eða taka ekki höfundarétt

2008-11-16T22:44:00.002Z

það er sem sagt stóra spurningin akkúrat núna en ég get bara hreinlega ekki tekið ákvörðun. Þó því fylgi engir sérstakir verkir að vera eins og ég er þá stundum vildi ég óska að ég gæti bara, þó ekki væri nema einu sinni, ákveðið eitthvað án þess að þurfa að velta því fyrir mér fram og tilbaka. Dilemmað núna snýst sem sagt um það hvort ég eigi að segja mig úr eina kúrsinum sem ég ákvað að taka með meistararitgerðinni eða hvort ég eigi að láta mig hafa það, girða í brók og hætta þessu væli.

Það sem mælir með því að ég segi mig úr kúrsinum er:
1. Ég er nú þegar búin að taka 24 einingum of mikið (skv. nýja einingakerfinu - 12. skv. gamla) og ef ég tek þetta líka þá verð ég með 30 einingum of mikið en maður getur víst bara verið með 120 einingar tilgreindar á meistaraskírteininu.
2. Ég er búin að eyða allt of löngum tíma í að skrifa ritgerð sem á að skila á morgun og er ekki búin.
3. Ég er búin að lofa því að senda hluta af mastersritgerðinni minni í yfirlestur á morgun og er ekki byrjuð að laga þá hluti sem þar þarf að laga og hvað þá fara yfir hvort eitthvað vanti.
4. Ég kem væntanlega ekki til með að hafa tíma til þess að lesa almennilega undir prófið þar sem ég má ekki missa mikið úr mastersritgerðarvinnunni sem engan endi virðist ætla að taka.
5. Það eru ágætar líkur á því að ég fái hærra fyrir mastersritgerðina ef ég einbeiti mér að henni.
6. Ég get jafnvel séð mér fært að mæta í vinnuna nokkrum sinnum fyrir jól.
7. Ég fer mögulega að sofa betur þegar ég sé fram úr fyrirliggjandi verkefnum.

Það sem mælir á móti því að ég segi mig úr kúrsinum er:
1. Maður á að klára þau verkefni sem maður tekur að sér.
2. Ef ég skyldi nú slysast til að fá góða einkunn í kúrsinum þá væri það alveg fínt upp á einkunnablaðið að gera.
3. Ef ég klára þetta ekki þá finnst mér ég vera alger vesalingur – fólk hefur nú gert annað eins.

Þetta er sem sagt alveg að ná að drepa niður gleðina í Gullulandi og magna upp þráhyggjuna sem er alltaf jafn velkomin eða þannig ;)

Gott að skrifa vorkenniðmérvælublogg svona mitt í kreppunni - það gerir lífið skemmtilegra ;) Spurning hvort ekki sé kominn tími á að dusta rykið af jólaserimóníunum og koma þeim í gluggana. Svo hugguleg birtan af þeim alveg hreint og það allra besta að rykhnoðrarnir í hornunum, sem eru alveg á stærð við meðal kettlinga, hætta að sjást ;)

Ástandið

2008-11-09T23:44:00.005Z

Gott skipulag á heimildunum! Hver þarf svo sem að sofa í rúmi, stofusófinn er bara alls ekkert síðri ;)

Fer alveg bráðum að nenna að setja inn myndirnar af Þórshafnarmótinu þar sem kvenfélagið fór svona líka á kostum - ætli það verði nokkuð endurtekið í bráð ;)

Mig langar svo!

2008-10-18T21:03:00.001Z

Gott að hugsa um það eitt þessa dagana hversu sniðugt það væri að leigja íbúðina mína, hætta að skrifa þessa blessuðu ritgerð og drífa mig bara út til Guatemala í einhvers konar sjálfboðaliðastarf! Alls engin geðveiki á þessum bænum ;)

Áfram Ísland

2008-10-15T19:51:00.008Z

Loksins, loksins! Loksins gerðist eitthvað jákvætt á þessu blessaða landi okkar, 1-0 sigur á Makedóníu í fótbolta nægir mér til að gleyma helv.. kreppunni þó ekki sé nema í smá stund. Öskur á sjónvarpið eru líka svo hressandi svona hvers dags ;)

Annars hefur kreppan engin áhrif á mig umfram það sem almennt er en maður getur ekki annað en borist með straumnum enda ekki um annað talað hvar sem maður kemur. Nú er ekkert annað að gera en að girða í brók, hætta að væla og rífa sig uppúr þessu! Það er eins gott að eftir 50 ár þá getum við sagt að við höfum lært eitthvað af þessu öllu saman!

Ókeypis sparnaðarráð í kreppunni frá mér er að drífa sig út í göngu - alveg fríkeypis og svo ótrúlega hressandi að anda að sér ferska loftinu. Ekki verra að slökkva á sjónvarpinu í leiðinni :) Betra en sálfræðimeðferð og ókeypis líkamsrækt! Ég fór í ótrúlega vel heppnaða göngu á Esjuna um daginn með Laufeyju, Ölmu og Iain vini Laufeyar frá Englandi sem var hér í heimsókn. Snjórinn, yndislega veðrið og skemmtilegur félagsskapur gerði þetta að mjög svo góðum degi og ég afrekaði það í fyrsta skipti að komast alla leið uppá topp - geri aðrir betur. Annars segja myndir meira en þúsund orð og koma hér nokkrar í tilefni dagsins.

Annað merkilegt er ekki að frétta héðan úr S5, ritgerðarskrif og heimildalestur í algleymingi og ég ekki alveg að standa mig nægilega vel í þeim efnum en ég SKAL þó klára á réttum tíma. Ég get hreinlega ekki meiri skóla og alls ekki meira krepputal ;) En þangað til næst, verið góð hvert við annað og reynið nú að hafa gaman af því að vera til - það þarf ekkert að kosta svo marga peninga.

Snjóar í kreppunni

2008-10-03T10:43:00.002Z

Pínulítið hippókratískt að mitt í frostinu sem tröllríður íslensku efnahagslífi skuli snjóa í Reykjavíkinni fyrir sunnan og það í byrjun október ;) Snjórinn gleður hins vegar mitt litla hjarta og ég væri mest til í að fara bara út að leika mér! Æ, hvað það væri nú notalegt að hafa snjóinn bara fram að jólum sem minnir á það að það fer að verða kominn tími til að huga að serimóníum til að skreyta höllina í svartasta skammdeginu.

Kreppuna hef ég hins vegar kosið að leiða hjá mér enda er maður svo sem vanur henni á námslánunum ;) Mig munar bara ekkert um það að borga þennan 15 þús kall auka á mánuði sem íbúðalánin mín hafa hækkað um - þakka bara fyrir að vera ekki með lán í erlendri mynt.

Af lífinu er það að frétta að lærdómur mikill mun yfirtaka það næstu vikur og mánuði en meistararitgerðinni á að skila þann 5. janúar 2009. Eftir það verður mér alveg sama þó ég þurfi aldrei að setjast aftur á skólabekk ;) Ég er reyndar mjög spennt fyrir efninu mínu og hlakka mikið til þess að kljást við það og reyna að skila frá mér einhverju af viti. Mesti vandinn er hins vegar að festast ekki í heimildaleitinni og byrja að skrifa, 10 bls. af ca 100 komnar og mættu vera fleiri ;) Það gengur sem sagt hægt en örugglega við ritgerðarskrifin líkt og með átakið góða!

Haustið

2008-09-26T08:35:00.003Z

Þessi mynd sem ég tók þegar ég keyrði heim af Kátum í sumar er dálítið lýsandi fyrir stemninguna í Gullulandi undanfarna daga og vikur. Rigningin sem er BARA búin að vera síðan ég kom heim frá Kanada er aðeins farin að verða þreytandi og liggur við að ég myndi frekar vilja hafa snjó í september en þessa endalausu rigningu sem gerir allt svo grátt og litlaust en fær mann þó til þess að hugsa og pæla í hlutunum og hvað það er sem maður sjálfur getur gert til þess að gera lífið svolítið skemmtilegra í staðinn fyrir að sitja og bíða eftir því að eitthvað gerist. Ég skellti mér loksins á salsanámskeið með Rán og Gló og nú dönsum við á sunnudögum eins og enginn sé morgundagurinn. Það er BARA gaman! Kvenfélagið er líka komið í átak og gott ef ég er ekki sú eina sem búin er að þyngjast í því átaki ;) Það er svo gott fyrir móralinn ;) Foreldrarnir áttu 30 ára brúðkaupsafmæli á miðvikudaginn sem eru að sjálfsögðu mikil gleðitíðindi og merkileg :) Gulla amma varð líka 80 ára í gær og hefur ákveðið að bjóða til fjölskylduveislu í bústað við Apavatn um helgina, með tilheyrandi áti og skemmtilegheitum. Ekki laust við að ég hlakki svolítið mikið til að komast aðeins út úr borginni þó ekki sé nema í 2 daga.

Annars hafa síðustu dagar farið í miklar pælingar um lífið og tilveruna og þátttöku mína í þeim leik. Pælingar um tilganginn með þessu öllu saman og sumt eflaust væmnara en eðlilegt þykir. Ég held að á síðustu árum hafi algengasta áramótaheitið mitt verið að komast aftur í samband við gamla vini - fólk sem mér þykir svo ótrúlega skemmtilegt en af einhverjum ástæðum hef misst samband við og finnst erfitt að hringja í eftir svona langan tíma. Ég hef misst af svo mörgum finnst mér, fyrst þegar ég fór í Zöruævintýrið góða og gleymdi því að ég gæti átt mér líf fyrir utan vinnuna og svo ekki síður núna í lærdómsgeðveikinni sem hefur staðið yfir síðustu 5 árin. Ég hef oft pælt í því hvað þetta fólk sé að gera í dag og einhvern vegin gert ráð fyrir því að það sé hamingjusamt og í góðum málum almennt - sem það örugglega er. Flestir að sinna sínu eins og ég hef verið að sinna mínu. Suma þekkti ég bara í stuttan tíma, aðra næstum alla mína ævi, en allt á þetta fólk sameiginlegt að hafa verið hluti af mínu lífi í einhvern tíma og átt vissan þátt í því að ég er sú sem ég er í dag.

Það er ekkert eðlilegra en að fólk missi samband hvert við annað, fólk þroskast í mismunandi áttir, sækist eftir ólíkum hlutum í lífinu eða bara hlutirnir æxlast með þessum hætti -það þarf ekkert að vera neitt slæmt. Manni verður engu að síður brugðið þegar maður sér að lífið er ekki jafn einfalt og gott og þær skýjaborgir sem maður hefur byggt sér í huganum og að slæmir hlutir geta hent fólk sem maður þekkti einu sinni og það er ekki hræsni að taka slíkt nærri sér. Ég er svo þakklát fyrir að hafa fengið að gera allt það sem ég hef gert í lífinu og fengið að kynnast öllu þessu fólki og ég geri mér grein fyrir að ég er sérstaklega heppin að hafa í kringum mig fólk sem gafst ekki upp á mér þrátt fyrir tímaleysi, sambandsleysi, próftímabil og tilvistarkreppur. Vini og fjölskyldu sem hafa gefið mér svo óendanlega mikið og ég vona að á einhverjum tímapunkti í lífinu þá nái ég að endurgjalda þeim.

Það sem síðustu dagar hafa kennt mér er að þegar mínum tíma lýkur vil ég hafa lifað lífinu, verið hamingjusöm, gert hluti öðrum til góðs og ekki hafa þá tilfinningu að ég hafi misst af einhverju sem ég hefði viljað gera af því að ég þorði ekki að láta slag standa.

Sumarið er búið .....

2008-09-13T23:43:00.003Z

og kvenfélagið komið í átak! ójá, nú skulu þau fá að fjúka aukakílóin og stefnan tekin á að verða flottasta kvenfélagið í bænum í desember!! Erfiðastur er súkkulaðiskorturinn sem hefur valdið miklu eirðarleysi og einbeitningarleysi á mínu heimili og helsta orsök þess að lærdómurinn hefur ekki farið jafn vel af stað og vonir stóðu til ;) Ekki laust við öfund í garð þeirrar sem má borða 10 fiskibollur á hverju kvöldi án þess að hafa áhyggjur af því að hliðarspikið dreifi sér langt aftur á bak!

En að öðru en þráhyggju minni vegna súkkulaðileysisins - sumrinu sem var bæ ðe vei bara æði. Strandirnar, Kvenfélagsútilegan, Kátir dagar, Bræðslan, göngur hingað og þangað, Buena Vista Social Club og Kanadaferðin gerðu þetta að einhverju besta sumri í háa herrans tíð og þarf mikið til að sumarið verði toppað.

Bloggið verður reyndar allt of langt ef ég á að fara að segja sögur af þessu öllu saman en þó verður að minnast aðeins á kvenfélagsútileguna sem var snilldin eina þrátt fyrir að rigningin hafi elt okkur þangað til komið var heim í dýrðina og dásemdina. Það sem bjargaði málunum var að sjálfsögðu partýtjaldið góða sem Tóta sá til að yrði keypt enda ekki gott fyrir kvenfélagsmeðlimi að þurfa að húka í litlu fortjaldi þegar mikið þarf að borða, hlægja og hafa gaman. Heimabakaða bakkelsið fékk því sér húsnæði og var tjaldið skýrt Þórsver með mikilli viðhöfn!

Að þessu sinni heiðruðum við Dæli í Víðidal með nærveru okkar heila helgi þar sem mjög vel fór um okkur. Við túristuðumst aðeins um Vatnsnesið og skelltum okkur í sund á Hvammstanga og þótti það bara nokkuð gott. Frá Dæli héldum við heim til Önnu á Lómatjörn þar sem vel var tekið á móti okkur og fengum við heilt hús til umráða og gátum þurrkað rennblaut tjöldin sem ekki hefðu þolað mikla rigningu í viðbót. Veiðin í Ystu-Vík sló í gegn en drengirnir og Hadda veiddu handa okkur kvöldmatinn sem grillaður var í Þverárdal í bústað foreldranna þar sem við gistum síðustu nóttina. Við komum svo heim til Þórshafnar á miðvikudagskvöld eftir að hafa rifjað upp gamlar minningar í Hljóðaklettum og Ásbyrgi.

Þetta var algerlega ógleymanleg ferð og allir gullmolarnir sem fengu að fjúka voru dásamlegir!! Eins gott að þetta er árlegur viðburður!

Í lok ágúst fór ég svo í heimsókn til Gaby minnar og Luis sem búa í Montréal í Kanada ásamt syni sínum Luka og litla bumbubúanum. Ég hef ekki hitt þau síðan ég fór í brúðkaupið þeirra í Guatemala árið 2003 og því spennan mikil, ekki síst að hitta Luka en ég tók það að mér að vera sjálfskipuð frænka daginn sem prinsinn fæddist. Það er skemmst frá því að segja að þetta var yndisleg ferð og svo gaman að koma til þeirra og fá smá innsýn í það hvað þau eru að gera í lífinu. Vonandi hafa þau tækifæri til að koma í heimsókn til Íslands fljótlega en það er svo margt sem mig langar til að sýna þeim.

Við byrjuðum á því á laugardeginum að fara til Quebec City þar sem við vorum svo "heppin" að komast á "International Festival of Millitary Bands" og var borgin því FULL af fólki sem fagnaði óspart hverju bandinu á fætur öðru. Ég verð að viðurkenna að þetta fellur ekki innan míns áhugasviðs en við notuðum daginn og skoðuðum borgina sem er einstaklega falleg og gamaldags en hún fagnar einmitt 400 ára afmæli á þessu ári.

Sunnudagurinn byrjaði með svamli í sundlauginni og sólbaði fyrir sólarþyrstan Íslendinginn en svo fórum við á vínekru þarna rétt hjá þar sem við tíndum epli og smökkuðum vínframleiðsluna. Yngsti meðlimur hópsins fór hreinlega hamförum í eplatínslunni og þurfti hreinlega að múta barninu svo hann fengist til að hætta svo gaman var hjá okkur. Á heimleiðinni sungum við svo Kalli litli kónguló á 3 tungumálum aftur og aftur og aftur þangað til móðirin gafst upp og setti Chi Chi Peralta í tækið og dilluðum við okkur og sungum si señor, si señor það sem eftir var leiðarinnar - veit ekki alveg hvort var betra ;)

Það var að sjálfsögðu stjanað við mig eins og ég væri drottningin í fjarskaniskan og allar uppáhalds uppskriftirnar frá Guatemala töfraðar fram.

Við fórum líka í gamla bæinn í Montréal (Vieux Montréal) sem var svo yndislega fallegur. Það allra besta var að við vorum þar í miðri viku þannig að það var ekki allt troðið af ferðamönnum og við gátum gengið um og notið lífsins eins og enginn væri morgundagurinn.

Chinatown var svo upplifun út af fyrir sig þó hverfið sé ekki stórt þá er eins og komið sé inn í allt annan heim.

Annars var rólegheitastimpillinn yfir þessari ferð, borðaður góður matur, slappað af, barninu spillt og verslað fyrir allan peninginn og við því að búast að nýrað verði selt svo peningur verði til fyrir visareikningnum ;) Þetta var svo akkúrat það sem ég þurfti á að halda og gott að geta hlaðið batteríin fyrir lokaátökin í skólanum. Best af öllu var þó samt að hitta þau Gaby og Luis sem alltaf eru jafn yndisleg og falleg og góð og kynnast villingnum honum Luka sem fanst þessi sjálfskipaða frænka bara nokkuð mögnuð og vildi gera allt eins og hún og var ekkert sérstaklega ánægður með að hún skyldi ákveða að fara heim. Ekki laust við að hann hafi brætt hjartað í frænkunni sem finnst hann að sjálfsögðu fallegasta og æðislegasta barn í heimi.

Nú er lífið hins vegar komið í sinn vanagang, vinna og lærdómur það sem allt snýst um og ekki laust við að ég telji dagana þangað til ritgerðinni verður skilað. Þangað til væri alveg sterkur leikur að ná að skrifa meira en 2 málsgreinar á hverjum tveimur vikum sem líða - annars verður ritgerðin frekar stutt ;)

Allt að gerast

2008-07-07T21:49:00.003Z

Það er einhvern veginn alltaf þannig að á hverju vori er tekin ákvörðun um að nýta sumarið til hins ýtrasta og svo áður en maður veit af er sumarið hálfnað og maður hefur ekki komið helmingnum í verk. Þetta sumar er öðruvísi :) Að sjálfsögðu er skemmtilegast að segja frá göngunni frá Djúpuvík yfir í Bjarnafjörð á Ströndum, yfir trékyllisheiði, enda var þetta bara æðislegt. Það er eitthvað svo hrikalega fallegt við Strandirnar að ég er ekki frá því að þetta sé að verða einn af mínum uppáhaldsstöðum á landinu. Gangan gékk að sjálfsögðu vel, eftir mjög svo sérstaka bílferð í Djúpuvík - Iceland from the rear window verður væntanlegt heiti heimildarmyndar um svaðilför þá ;) Einn göngugarpur þurfti reyndar að snúa við þegar gömul meiðsl tóku sig upp en við vorum sex fjallageitur sem héldum áfram og gengum í u.þ.b. 7 tíma. Sumir ónefndir og þindarlausir tóku reyndar upp á því að hlaupa restina af leiðinni með nestið á bakinu og vakti það mikla lukku hjá þeim sem eftir voru ;) Erfiðast var án efa að fara yfir Goðdalsánna því það var svo mikið leysingavatn í henni og þegar ég stóð a steini út í miðri á, tilfinningalaus í fótunum frá hnjám og niður var ég nokkuð viss um að ég myndi daga uppi og verða að steini sjálf því ekki hvarflaði að mér að halda áfram og ekki gat ég snúið við! En maður er nú ekki dreifbýlingur fyrir ekki neitt þannig að það var ekki annað að gera en að draga djúpt andann og láta sig vaða. Grill í Sunndalnum og spjall við allt þetta skemmtilega fólk kórónaði svo daginn en helgin verður að teljast með þeim betri á árinu.

Í gær var svo haldið í Botnsdalinn ásamt góðum hópi fólks og gengið upp að Glym í glampandi sól og steikjandi hita. Erfiðasta leiðin var að sjálfsögðu valin af sérlegum "farangurstjóra" sem leiðsagði eins og sannur atvinnumaður og passaði að allir færu nú rétta leið en um 70% fólks sem fer að Glym sér aldrei fossinn almennilega þar sem það fer vitlausu megin upp - doltið vandræðalegt ;) Alveg sérdeilis vel heppnaður dagur sem endaði svo í S3 í grillveislu og útilegufundi.

Skálagerðið fer svo að verða komið í sparigallann eftir mikinn mokstur og þó nokkurn dugnað þar sem einu og hálfu tonni af grjóti var mokað í fyrrum blómabeð og allar áhyggjur og óþarfa mórall yfir arfanum sem yfirtekið hafði beðið því horfnar. Stefnan er að klára allt fyrir helgina því nú er komið að "árlegri" útilegu kvenfélagsins ásamt viðhengjum og börnum og svo er stefnan tekin heim í dýrðina og dásemdina á Káta Daga. Passar ágætlega að um helgina er spáð hellirigningu um allt land og hvergi von á sólarglætu. Það borgar sig að hafa plan A og B ef öðru hvoru megin á landinu skyldi vera rigning - þá förum við bara hinum megin!! En maður lætur regnið ekkert á sig fá og klæðir sig bara betur - svo lengi sem sólin skín á Happy Days þá verð ég sátt.

Það er svo ýmislegt annað planað í sumar, pallapartý, tónleikar í Bræðslunni á Borgarfirði Eystri, afslappelsi í bústaðnum hjá mömmu og pabba, heimsókn til Gaby og Luis í Montréal og svo langar mig alveg hryllilega mikið að fara að sjá Buena Vista Social Club en ég var svo heppilega mikið að vinna þegar það ágæta fólk spilaði hér síðast og þó margir góðir séu fallnir frá þá er ég viss um að þetta verða bara æðislegir tónleikar.

Jæja, þá er nóg komið af bulli og best að fara að gera eitthvað af viti!! Fólk á heldur ekkert að vera að lesa bloggsíður núna, farið út og njótið sumarsins :o)

Hæ hó jibbí jei

2008-06-17T18:29:00.003Z

17. júní mættur á svæðið og ekkert betra en að sofa í sólbaði á nýja sólpallinum sem er bara að gera góða hluti. Skálagerðisíbúar, þ.e. ég, Tóta og Anna og Halldóra og Gummi, lögðum í það þrekvirki að loknum próflestri að skella upp þremur sólpöllum á einni viku og geri aðrir betur. Við nutum dyggrar aðstoðar Höddu, Ása og Línu og ekki var verra að pabbinn kom í bæinn akkúrat til að hjálpa frumburðinum. Er almennt talið að fegurri og betri sólpallar hafi aldrei litið dagsins ljós norðan alpafjalla en sökum þess að myndavélin mín gaf upp öndina af ókunnum ástæðum um daginn eru engar myndir til af herlegheitunum en hér má sjá myndirnar hennar Tótu úr pallasmíðinni.

Svo má nú ekki gleyma að minnast á að kvenfélagsdömurnar Halldóra og Rán útskrifuðust á laugardaginn sem leikskólakennari og lífeindafræðingur og fengu fullt af fullorðinsstigum í kladdann - bara duglegar. Sigga lögfræðiskvísa útskrifaðist líka á laugardaginn og er því orðinn fullgildur lögfræðingur stelpan. Til hamingju með þetta allar þrjár :o)

Í tilefni sumarsins hef ég gerst göngugarpur mikill, búin að fjárfesta í útbúnaði til að príla upp á hvaða fjall sem er og bara verið sæmilega dugleg við að nýta hann. Við Sigga fórum í gærkvöldi í miðnæturgöngu yfir Leggjabrjót með Útivist og löbbuðum í 6 tíma með stórum hópi fólks. Það var bara gaman og veðrið æðislegt þó svo að hnén hafi aðeins verið farin að kvarta þegar komið var á leiðarenda. Um helgina er svo stefnan tekin á Strandirnar ásamt Svönu minni og Binna og Ingu og Friðbirni og ætlum við að ganga um 16 kílómetra frá Djúpuvík og yfir í Sunndal í Bjarnafirði, yfir Trékyllisheiði. Ég er orðin yfirmáta spennt og viss um að þetta getur ekki annað en lukkast vel :)

Annars gengur lífið bara sinn vanagang eins og alltaf, vinnan fín og ég alveg að hafa mig í að byrja á lokaverkefninu mínu sem stefnan er að skila um áramótin. Þá lýkur vonandi setu minni á skólabekk, allavega í bili.

Bara 5 dagar eftir

2008-05-10T16:04:00.002Z

og þá kemst ég í langþráð sumarfrí frá skólanum :) Hef nú afrekað það að sofna bara í ca. 20 mínútur yfir bókunum í dag sem er mikil framför síðan í gær en þá sofnaði ég í örugglega 2 tíma!!

Spurning hvort maður hefur haft það of gott síðustu tvö árin þar sem maður hefur ekki farið í eitt einasta skriflegt próf sem sást best á því að ég áttaði mig á því í morgun að ég á engan almennilegan penna fyrir þetta blessaða próf á þriðjudaginn!! Því var snarlega kippt í liðinn og vinnupenninn sóttur ;) Maður er náttúrulega ekkert eins og fólk er flest og getur þar af leiðandi ekki skrifað með hvernig penna sem er og það sem er ennþá betra er að nú er maður farinn að blogga um penna eða pennaleysið öllu heldur ;) Spennan í lífinu er gríðarleg þessa dagana.

Nú er bara spurningin hvort maður geti haldið út í 5 daga í viðbót og lifi af kaffidrykkjuna sem verður lagst í fyrir barnaréttarprófið á miðvikudaginn þar sem stefnan er tekin á 24 tíma lestur fyrir próf.

Próflestur

2008-05-06T15:12:00.002Z

Vá hvað maður nennir endalaust að blogga þegar maður er í próflestri - kannski ekki skrýtið þegar maður á að vera að lesa um "and-mismununar löggjöf" ;) Tvö próf búin og þrjú eftir og merkilegt nokk þá hefur bara gengið skítsæmilega miðað við lestur og almennan undirbúning. Það er bara alveg gjörsamlega vonlaust að einbeita sér að bókunum svona á vorin, þá á maður bara að vera að gera eitthvað allt annað!

Plönin fyrir sumarið eru þau að gera þetta að göngusumrinu mikla og fara loksins að gera eitthvað sem manni finnst skemmtilegt í staðinn fyrir að bíða eftir því að eignast mann sem nennir að dröslast með manni á fjöll. Það er orðið útséð með það vegna hins háa aldurs (og eflaust af fleiri ástæðum) og því ekkert annað í stöðunni en að taka málin í eigin hendur, hætta þessu væli og reima á sig skóna.

Skálagerðisbúar eru svo búnir að leggja það í nefnd að fá að byggja sér sólpalla til að njóta hins frábæra íslenska sumars til hins ítrasta. Pallapartý og grillveislur um hverja helgi! Greyið Gummi að hafa fengið það verkefni að smíða 3 palla með aðstoð frá Skálagerðisdömunum ;) Held nú samt að það sé hægt að setja okkur í fleiri verkefni en virðist við fyrstu sýn - við erum nú ekki dreifbýlingar fyrir ekki neitt!

Annars best að halda áfram með lesturinn - bara rétt rúm vika eftir!

Blessuð börnin

2008-04-27T13:03:00.002Z

Er það ekki alveg dæmigert að loksins þegar maður kemst í lærdómsgírinn (ekki seinna vænna) þá kjósi hópur ókunnugra barna að leika sér í garðinum mínum - hvað varð um það að vera bara í tölvunni?!? Væri fínt að fá smá vorhret svona fram yfir 14. maí svo lærdómsfriðurinn haldist ;)

Sumarið er komið

2008-04-25T23:43:00.004Z

Próflestur í fullum gangi - ég er allavega byrjuð og búin að telja mér trú um að ég geti þetta því þetta verður í vonandi í síðasta skipti sem ég eyði vorinu í lestur. Svo er bara að bíða og sjá hvernig þetta fer allt saman.

Upplifði þann merka áfanga um síðustu helgi að komast loksins í fullorðinsflokkinn. Það varð að sjálfsögðu að fagna því og var boðað til veislu á Klapparstígnum hjá Settinu sem stóðu sig ótrúlega vel í að bera í fólk áfengi og veigar. Skemmst frá því að segja að ég skemmti mér ótrúlega vel enda ekki annað hægt þegar maður þekkir svona mikið af skemmtilegu fólki. Myndbandið frá Gumma og Guffa og plakatið og kórónan fína frá dömunum vakti mikla lukku og var mikið hlegið. Takk annars öll fyrir frábært kvöld! Ég hafði það loksins af að setja inn myndir og bara fallegar því sumar eru ekki hæfar til að birta á veraldarvefnum ;)

Dömurnar + viðhengi og börn voru skelltu sér svo í Keflavíkina í afmæli hjá Arngrími Agli á laugardaginn en litli músi varð 2ja ára og kann sko að telja upp á tíu. Það var bara dásamlegt að fá hamborgara a la Gunni til að vinna aðeins á veikindum laugardagsins og alltaf svo gott að koma í heimsókn í Keflavíkina.

Hef annars frekar lítið að segja og þar sem það er betra að þegja og vera talinn heimskur heldur en að tala og taka af allan vafa þá læt ég þetta gott heita í bili.

Verið góð hvert við annað

Bloggleti

2008-02-24T12:20:00.003Z

Hún hrjáir mig mikið þessa dagana, letin - ekki bara bloggletin heldur bara almennt. Veit ekki hvort þetta er tilvistarkrepputengt en held allavega að ég taki mér smá pásu frá blogginu. Kanski maður standi sig betur þegar maður verður kominn á fertugsaldurinn!!!!

Over and out!

Hann er mættur á svæðið!

2008-02-06T21:27:00.000Z

Sæti litli molinn hennar Línu ákvað að koma í heiminn í dag og ekkert lítið búið að bíða eftir honum ;) Bara fallegastur :) Elsku Lína og Bensi, til hamingju með litla fallega prinsinn ykkar. Spurning hvort dömurnar fari nú að huga að flutningum í Mosfellsbæinn ;)

Þrek

2008-01-29T11:12:00.000Z

Vá hvað ég á eftir að fá mikla strengi eftir þennan þrektíma í morgun! Vísbending um að maður sé alls ekki í eins góðu formi og maður heldur - eða að maður eigi að sleppa því að éta eins og hross í hvert skipti sem maður sér mat á borðum?? Maður spyr sig!

Djöfull er samt gott að vera byrjuð!

Snjór í Skálagerðinu

2008-01-21T19:47:00.000Z

Snjórinn í Reykjavíkinni hefur sko aldeilis fallið í kramið í Skálagerðinu og spurning hverjir skemmti sér betur, börnin eða við þessi "fullorðnu".

Nú er það búið

2008-01-18T23:54:00.001Z

Þegar maður kýs að eyða föstudagskvöldi í það að laga sírennslið í klósettinu heima hjá sér verða líkurnar á því að maður pipri að teljast 99%.

Suma hluti verður maður bara að sætta sig við ;)

Hvað er málið!

2008-01-12T11:58:00.000Z

Halda menn að þeir geti bara rænt 11-11 búðina mína með reglulegu millibili! Ekki líst mér á það - og ég sem bý í besta hverfinu í bænum (að mínu mati allavega). Held að þessir aumingjar ættu að girða í brók og reyna að vinna eins og menn í staðinn fyrir að hræða líftóruna úr vinnandi fólki. Ég hef því miður enga samúð með svona vesalingum - ef þú ert nógu heimskur til að lenda í ruglinu (þú rænir væntanlega ekki búð nema vera í ruglinu) þá nenni ég ekki að vorkenna þér!

Kíkti annars í bæinn með lögfræðiskvísunum í gærkvöldi í kjaft og hvítvín. Það var bara gaman og á köflum mjög áhugavert. Gubbulyktin inni á Vegamótum var hins vegar ekki að gera góða hluti - stundum sakna ég reykingastybbunnar!

Sófaleiðangur næstur á dagskrá og svo dömuboð í Mosó í kvöld :)

Lítil prinsessa

2008-01-06T20:13:00.000Z

Hún Helga mín átti í dag litla prinsessu :) Elsku Helga, Hlynur og Henrý Jarl stóri bróðir, til hamingju með þessa yndislegu viðbót við fjölskylduna :D

Nú þarf ég að fara að gera mér ferð norður til að fá að sjá hana!

Nýja árið

2008-01-06T17:23:00.000Z

2008 mætt á svæðið án þess að maður fái við neitt ráðið. Ég ætla svo sem ekki að vera með neinn áramótapistil - árið 2007 var að mörgu leiti gott og að mörgu leiti glatað og einhverjar líkur á að 2008 verði svipað. Engin áramótaheit heldur enda miklar líkur á að þau standist ekki ef miðað er við árangur af fyrri strengingum áramótaheita! Ég hef þó ákveðið að heiðra ræktina með nærveru minni þar sem ég var svo heppin að komast á íþróttastyrk og þá er nú spurning hvort lífið fylgi ekki með í kjölfarið. Tóta bauð í afmælisdömuboð á föstudaginn sem leiddi til þess að lífstílsbreytingunni var frestað til mánudags enda ekki annað hægt en að gúffa vel í sig af kræsingunum sem gamla bauð uppá. Nú er unnið að því af kappi að klára sykurbirgðirnar í Skálagerðinu svo það verði ekki hægt að verðlauna sig með súkkulaði fyrir hverja ferð í ræktina ;)

Fyrirfram virðist verða það markverðasta á árinu að ég á afmæli, eins og reyndar á undanförnum árum, nema hvað að núna virðast endalokin vera farin að færast nær og nær! Held ég verði að fara að breyta planinu aðeins því það er fátt sem hefur verið strokað út af listanum yfir það sem gerast átti í lífinu fyrir þrítugt! Hef þó með lagni náð að túlka 60 fermetra íbúðina mína sem hús og það að ég gæti klárað námið í vor verður látið duga undir liðnum "klára skólann" þrátt fyrir að ég hafi ákveðið að seinka útskriftinni aðeins! Allir hinir 10-20 liðirnir verða að bíða eftir betra tækifæri til að verða kláraðir - spurning hvort að sumt verði raunhæft eftir að maður kemst í fullorðinsflokk ;)

Skólinn byrjar í fyrramálið - fögur fyrirheit eins og alltaf en spurning hvað það endist lengi ;)

Gleðileg jól

2007-12-24T12:29:00.001Z

Þá er ég komin heim í dýrðina og dásemdina og hef lítið annað gert en að gæða mér á konfekti, smákökum og hráu hangikjöti. Snjórinn er kominn þannig að nú geta jólin komið. Ég átti yndisleg jól í Danmörku í fyrra þannig að nú hlakka ég enn meira til að vera heima um jólin, enda er það alltaf best.

Ykkur öllum sendi ég mínar bestu óskir um gleðileg jól og hamingjuríkt komandi ár. Takk fyrir allt á árinu sem er að líða og megi árið 2008 færa ykkur gleði, frið og góðar stundir.

Oft var þörf en nú er nauðsyn!

2007-12-17T01:52:00.000Z

Sérlegir sveitarstjórnarstraumar óskast í dag milli 11:48 og 12:00 (ójá þeir eru sko nákvæmir í tímasetningunni strákarnir)! Allir þeir sem kunna sveitarstjórn (látum réttinn liggja milli hluta) eru beðnir um að leggjast á bæn eða stunda hugleiðslu og senda í sameiningu kunnáttu fyrir allan peninginn í Lögberg. Ástæðan - gamla er ekki alveg nógu vel lesin en þætti djöfullegt að missa meðaleinkunn annarrinnar niður fyrir 9!

Í staðinn verða sendir út sérlegir þakkarstraumar í 12 mínútur frá því einkunn hefur verið kunngerð með formlegum hætti - og nú held ég að það sé tími kominn á að leggja sig ;) Jólafrí eftir 10 tíma!!!

Smákökubakstur

2007-12-15T21:02:00.000Z

Piparkökumeistararnir Maja og Gunna

Það var nú heldur betur gleðin í Skálagerðinu í dag þegar dömurnar og skæruliðarnir bökuðu smákökur fyrir jólin. Jólatónlistin var tjúnnuð í S3 og piparkökulyktin fannst um allt hverfið. Dagurinn byrjaði á þessu rosalega morgunverðarhlaðborði sem svignaði hreinlega undan hollustunni, þó sumir hafi reyndar kvartað yfir því að enginn væri ísinn með eplapæinu - ég meina komm on, maður má nú leyfa sér smá á laugardögum ;)

Fallegar á leiðinni í ofninn

Guðmundur Hólm og Tóta stóðu sig vel í eldhúsinu

Ránsa í kreminu

Komnar úr ofninum og tilbúnar fyrir glassúrinn

Það var spurning þegar kom að skreytingunum hverjir hafi skemmt sér betur, börnin eða "fullorðna" fólkið - allavega var einbeitningin mikil og allir að keppast um að gera flottustu kökuna. Var mikill harmleikur þegar sumir misstu fullkomnu kökuna á hvolf að verki loknu (nefni engin nöfn en fyrsti stafurinn er Hadda)

Músi mættur með bílana

Jóhann og Orri skreyttu

Það varð nú reyndar líka að taka smá pásur inn á milli, til að fá svala og smakka á piparkökunum góðu fínu.

Dagbjört María sæta skvísa

Unnar Gamalíel

Framleiðslan var með eindæmum vel lukkuð og spurning hvort dömurnar ættu að fara að huga að því að selja á frjálsum markaði því góðar voru þær ;) Ekki spurning um að þetta þarf að endurtaka á næsta ári. Takk fyrir daginn elskurnar - þetta var bara dásamlegt.

Afraksturinn

Bærilegt

Næst á dagskrá er svo sveitarstjórnarrétturinn á mánudag. Ég get ekki beðið eftir að komast í jólafrí.

8 dagar í heimferð!

2007-12-13T11:23:00.000Z

Og bara 4 dagar í síðasta próf.... þá verður sko kátt í höllinni. Annars hafa prófin bara gengið vel og útkoman framar björtustu vonum. Það greinilega borgar sig að fara í tvær utanlandsferðir á önn, vinna allt of mikið, flytja og taka eitt stykki íbúð í gegn og alls ekki, undir neinum kringumstæðum, opna bók! Held nú samt að sveitarstjórnarrétturinn komi til með að draga meðaleinkunnina aðeins niður en who cares!

Dömurnar ætla að baka smákökur og konfekt á laugardaginn, komnar nokkrar geðveikt girnilegar uppskriftir og nokkuð ljóst að það verður massa átak eftir áramót. Spurning hvernig Eyþór ætlar að hafa opið fyrir okkur um jólin.

Anyways, þetta er sem sagt bloggið um ekkert - enda lítið að segja þegar skólabækurnar eiga hug manns allan. Ég gæti mögulega þulið upp fyrir ykkur helstu einkenni lífeyristrygginga og bótaflokka en held að þá verði ég að viðurkenna fyrir sjálfri mér að geðheilsan sé farin ;)

15 dagar í dýrðina og dásemdina

2007-12-06T12:11:00.000Z

Það er ekki annað hægt en að komast í jólagírinn þegar þessi líka fallegi jólasnjór hefur heiðrað Reykjavíkina fyrir sunnan með nærveru sinni :) Það verður allt svo fallegt sem annars er búið að vera grátt síðan í sumar því hér hefur varla stytt upp síðan í ágúst! Það er að sjálfsögðu búið að skreyta allt í S5 og svo ætla dömurnar að hittast allar og baka smákökur þann 15. des (þegar allar verða búnar í prófum nema ég!) og það verður bara til þess að jólastemningin verður alger. Ég fer svo heim í dekrið 21. des, klyfjuð gjöfum og hlýjum fötum því það ætlar að verða svo mikill snjór ;) Ég hlakka svo til, ég hlakka alltaf svooooooo til ......

Fyrsta prófið búið og útkoman bara ljómandi góð, vonandi að þetta haldi svona áfram. Virðist hafa góð áhrif að tína nennunni og metnaðnum svona allavega eina önn.

Jæja, persónurétturinn bíður.

Próflestur þýðir bara eitt ....

2007-12-01T13:12:00.000Z

Jólin eru á næsta leyti :)

Svona er miðbærinn í Árósum fallegur um jólin :)

Það er eitthvað svo hressandi við jólaauglýsinguna frá Tuborg og minnir mig svo á jólin sem ég átti í Danmörku í fyrra. Er hins vegar mjög ánægð að verða heima um jólin og áramótin núna enda eru stórir flugeldar nú bannaðir í Danmörku eins og sjá má af þessari frétt hjá strákunum á Jótlands póstinum. Þá er nú aldeilis gott að geta verið á stórkostlegri flugeldasýningu í dýrðinni og dásemdinni á Þórshöfn á Langanesi ;)

Helst í fréttum þessa dagana er stress og aftur stress, dauði og djöfull enda próflestur í gangi ;)Get nú samt ekki sleppt því að minnast á þær gleðifréttir að nýjustu íbúðareigendur í Skálagerðinu góða, Halldóra og Gummi, standa nú í flutningum. Bærilegt það :)

En ... Back to the books (svona þegar ég verð búin að fara út í búð að kaupa laugardagsnammi fyrir allan peninginn - nota bene þá eru allir dagar í próflestri laugardagar!)

Ætli það sé of seint að hætta við

2007-11-27T14:02:00.000Z

Í gærmorgun upplifði ég það í fyrsta skipti í 5-6 ár að ég gat eiginlega ekki vaknað nógu fljótt til að ná að koma því frá mér sem hlaðist hafði upp í hausnum á mér um nóttina. Í ljósi tímasetningarinnar hefði verið mjög svo æskilegt að þetta hefðu verið hugmyndir varðandi ritgerðirnar sem bíða þess að verða kláraðar en nei ....

Ég rauk á fætur og með stýrurnar í augunum leitaði ég að blaði og blýanti svo ég gæti farið að teikna! Já, ég segi það og skrifa: teikna! Málið vandaðist aðeins þegar kom að því að myndin þurfti að fá á sig lit því flestir eru nú litirnir lengst ofan í kassa en maður lætur það nú ekki á sig fá þegar ritgerðarvinnan er það sem bíður og drífur sig að sjálfsögðu niður í geymslu að leita í kössunum. Nú á ég þessa fínu mynd af myndinni sem á að fara upp á stofuvegginn heima hjá mér þegar tími vinnst til að mála hana - svona um það bil í janúar.

Það sem er mest svekkjandi við þetta allt saman er að ekki einu sinni hefur mér þótt það sem ég er að fást við í lífinu þessa daga það spennandi að ég hef ekki getað sofið vegna þess að ég hlakka svo til að fást við þau verkefni sem fyrir liggja. Man einhver af hverju ég fór í lögfræði? Ég er nefnilega búin að gleyma ástæðunni.

Ritgerðarvinna dauðans

2007-11-10T11:06:00.000Z

Hvorki tími né nenna til að blogga þessa dagana. Lærdómurinn og vinnan hafa yfirtekið líf mitt sem gerir það að verkum að það er ekki frá neinu skemmtilegu að segja - og þá er nú betra að segja bara ekki neitt ;)

Fór annars í dásamlega ferð til Tyrklands í lok september í boði míns yndislega bróðurs og læt fylgja með nokkrar myndir frá því öllu saman :)

Við vorum í bæ sem heitir Icmeler þar sem við létum okkur ekki vanta á ströndina né að taka út bátana enda hvoru tveggja mjög nauðsynlegt.

Að sjálfsögðu var farið út að borða á hverju kvöldi

Og sérstök veisla haldin í tilefni af 29 ára brúðkaupsafmæli foreldranna.

Við löbbuðum og löbbuðum og löbbuðum og löbbuðum - þó í flestum tilvikum á milli búða en einhverra hluta vegna náðust engar myndir af þeim ósköpum öllum ;)

Þarna er hópurinn saman kominn á Harmony bar en þar var þetta snilldar breska dragshow - Hláturrokurnar heyrðust örugglega alla leið yfir á Marmaris!

Kókaínpoppið kom svo að góðum notum í eyrun þegar austurevrópska dansmússíkin tryllti lýðinn á diskótekunum

Held ég láti þetta gott heita í bili enda bíður mín ritgerðarvinna í hinum geysiskemmtilega persónurétti - set mögulega inn myndir úr Skálagerðinu við tækifæri en loksins loksins er ég flutt aftur heim til mín :)

Nýtt líf

2007-09-09T12:22:00.000Z

Jamm, lífstílsbreyting á dagskrá þessa dagana, átak eitthvað svo sad svo lífstílsbreyting it is. Sit við borðstofuborðið heima hjá mér og les sveitarstjórnarréttinn, langar geðveikt út að hlaupa en nenni því ekki af því ég veit að þolið er ekkert og finnst þess vegna ekki taka því að byrja. Það er líka alltaf gott að nota lærdóminn sem afsökun fyrir hreyfingarleysinu, allavega hefur það virkað vel hjá mér síðustu 4 árin. Held ég byrji bara á nýja lífinu á morgun ;)

Annars þarf ég ekki síður að taka til í hausnum á mér, einhvern vegin held ég að allir verði fyrr eða síðar að horfast í augu við það sem betur má fara í lífinu. Ef það eiga einhvern tíman að verða breytingar þar á þá verða þær að koma frá manni sjálfum.

Djúpar pælingar í gangi þessa dagana, fróðlegt að sjá hvort þær skili einhverjum árangri.

Barcelona

2007-09-08T12:18:00.000Z

Í KEF fyrir brottför - strax komnar með poka

Ein af mínum uppáhaldsborgum í öllum heiminum. Þrátt fyrir að hafa ekki séð bestu hliðarnar á henni þegar ég var að vinna í Zöru þá fannst mér borgin sem slík alltaf svo mikið æði, La Sagrada Familia, Casa Batlló, La Pedrera, Park Güell, Montjüic, la Fontana Mágica, Barrio Gotico, La Rambla, Plaza Real, allt þetta og svo margt fleira gerir það að verkum að maður getur gleymt sér dögunum saman og væri alveg sama þó maður kæmi aldrei aftur heim.

Iglesia de la Mercé og þessar fallegu svalir voru meðal þess sem við sáum í hverfinu okkar

Ekki skemmdi félagsskapurinn heldur fyrir, svona ferð getur ekki annað en heppnast vel þegar maður á svona frábærar vinkonur. Það var hlegið og hlegið fyrir allann peninginn. Hetjuskapurinn var misjafn, á meðan sumar fengu áfall yfir því að sjá fram á að það eina sem væri á matseðlinum fyrir utan kolkrabba væri smokkfiskur þá fengu aðrar tremmakast þegar stigið var inn í kláfinn sem flytja átti drottningarnar frá Barceloneta og upp í Montjüic. Allt bjargaðist þetta þó að lokum og við sáum helling, versluðum helling, borðuðum helling og hlógum eins og vitleysingar.

Þessir voru að skemmta niðri við höfnina og fóru algerlega á kostum

Fresta varð strandferðinni af óviðráðanlegum orsökum, aðallega því að verslunargenið hafði yfirhöndina og versluðum við fyrir allan peninginn og gott betur en það. Merkilegt hvað mann vantar alltaf mikið af dóti þegar komið er inn í búðirnar. Það var heldur ekki leiðinlegt að labba um í Barrio Gotico (þar sem við áttum heima bæ ðe vei) og skoða hönnunarbúðirnar, þó sumir (aðallega ég) hafi verið búnir með peninginn þegar í þær var komið ;)

Það var hreinsað út úr H&M

Það eina sem olli smá vonbrigðum var Picasso safnið sem var samt ágætt en ekki jafn frábært og búist hafði verið við. Starfsfólk safnsins fær líka fílukarl ferðarinnar fyrir almennan fílusvip og leiðindi. Sem betur fer þurftum við ekki að borga okkur inn ;) La Sagrada Familia og Park Güell komu hins vegar sterkt inn ásamt La Fontana Mágica (svona þegar við fundum gosbrunninn loksins). Þegar á heildina er litið var þetta allt saman súper vel heppnað. Takk fyrir ferðina skvísur, skiptir mestu máli að hafa skemmtilegt fólk með sér til að gera ferðina skemmtilega - ég er strax farin að hlakka til næstu ferðar :)

Dömurnar mættar í Park Güell

Skólinn byrjaður og næst á dagskrá að byrja að lesa skólabækurnar. 12 dagar í Tyrklandsferðina svo það er eins gott að halda rétt á spöðunum ;) Stemning sem fylgir því að vera alltaf hreint í útlöndum.

Bloggleti

2007-08-14T21:58:00.000Z

Spurning hvort maður eigi að kvarta yfir bloggleti annarra þegar eigið blogg er nær dauða en lífi ;) Glóan mín þó sú eina sem hefur kvartað en maður lætur nú ekki segja sér það tvisvar að maður sé lélegur bloggari ;)

Skvísurnar á Happy Days

Sumarið að verða búið. Því hefur að mestu verið eytt í vinnu en þó smá skemmtun inn á milli. Kátir Dagar í dýrðinni og dásemdinni voru náttúrulega bara æði eins og vera ber. Mamman átti afmæli helgina eftir og í tilefni af því var farið í ferð eins og í gamla daga þegar börnin voru öll í aftursætinu - við tókum ekkert meira pláss núna ;) Fórum á Þeystareyki og í Mývatnssveit þar sem jarðböðin og túristabúðirnar komu sterkt inn. Verslunarmannahelginni var svo eytt í Úthlíð með Völlu minni og Einari og við fengum Glingló og Brynju í heimsókn með stóra tjaldið. Næsta ferðalag er svo eftir 18 daga þegar dömurnar halda til Barcelona í langþráð húsmæðraorlof og ekki laust við að spennan sé farin að segja til sín. Mér finnst svo stutt síðan ég var í Barcelona í Zöru-ævintýrinu en það eru víst komin 6 ár síðan. Verður gaman að koma til borgarinnar í túristaleik en ekki til að vinna og fullt af stöðum komnir á blað yfir "must see" á meðan við verðum verðum á svæðinu og við ætlum að sjálfsögðu að mála bæinn rauðann.

Held það sé til eins mynd af okkur frá því fyrir um 15 árum síðan

Er búin að færa allar myndirnar mínar á nýja myndasíðu þar sem gamla mín lokar núna í september. Hef meira að segja afrekað það að setja inn myndir frá síðustu dögunum í Danmörku og öllum ferðum sumarsins. Nenni ekki lengur að hafa link inn á hvert albúm heldur er þetta allt bara undir myndir hér til hliðar.

Happy Days

2007-07-20T07:23:00.000Z

Eftir um það bil 5 tíma mun ég bruna á gullmolanum mínum heim í dýrðina og dásemdina á Káta daga. Mikið hlakka ég til :)

Sumarið er tíminn

2007-07-15T19:30:00.000Z

til að vinna, loksins þegar sólin skín í Reykjavíkinni fyrir sunnan :)

Veit ekki alveg hvar ég á að byrja á þessu bloggi því það er mikið búið að gerast í Gullulandi síðan síðast. Síðan síðast þá hef ég ...

Haldið eitt stykki kveðjupartý í Danmörku og djammað með góðu fólki fram undir morgun (meira að segja búin að setja inn myndir af því)
Farið á Skagen með Áróru, Ásgeiri Karli og Evu Katrínu og notið lífsins eins og drottning. Þar var ströndin í aðalhlutverki og stóð sig vel.
Tekið síðasta hringinn á skemmtistöðum Árósa (allavega í bili)
Pakkað niður lífinu í Danmörku
Verið á barmi taugaáfalls - ekki skrýtið þegar þráhyggjan flytur á milli landa ;)
Kvatt svo mikið af fólki sem mér þykir vænt um
Flutt heim til Íslands
Hitt fullt af fólki sem mér þykir skemmtilegt
Farið í skemmtiferð í Skagafjörð og Húnavatnssýslur með vinnunni minni - mikið ofboðslega var það gaman
Kíkt á djammið í Reykjavíkinni sem hefur nákvæmlega ekkert breyst frá því ég fór til Danmerkur nema hvað að núna kemur maður ekki heim og angar eins og öskubakki - sem er hér um bil eini kosturinn við djammið í Reykjavík
Farið á Kántrýball þar sem vinkonuhópurinn minnkaði meðalaldurinn all svakalega og þar sem við vorum allar búnar að komast á séns eftir korter - vorum ekki lengi af augljósum ástæðum ;)
Grillað með dömunum (+Gumma og Ása) og planað Barcelonaferð í haust
Keypt mér bíl - hann er alveg gullfallegur og klæðir mig svo vel.
Keyrt norður á Strandir með Svönu þar sem við vorum ekki alveg klárar á miðstöðvartækninni í nýja bílnum - skemmst frá því að segja að við önduðum vel að okkur útblæstri annarra bíla í Hvalfjarðargöngunum.
Eytt 150% yndislegri helgi í Sunndal (í Bjarnarfirði á Ströndum) enda ekki við öðru að búast þegar tímanum er eytt með jafn miklu eðal fólki og þarna var á ferðinni. Svoleiðis aldeilis hægt að draga í sig orkuna á Ströndunum og hlaða batteríin.
Keypt mér glös í Kaupfélaginu á Drangsnesi (það bara hreinlega varð að koma fram þar sem farin var sérstök skoðunarferð í Kaupfélagið þegar ég fékk guided tour um Strandirnar)
Spilað Uno, Asna og ömmuspil þar sem Helga Björg átti gullkorn ferðarinnar: "Þetta spil er svo mikið damn it að ég er að drepast í fótnum."
Fengið búslóðina mína eftir aðeins rétt tæpa mánaðarbið og fengið að borga arm og fótlegg í toll fyrir hana - mikið var það nú ánægjulegt!
Farið í rafting með þeim eðalpæjum, Siggu og Möttu og vá hvað það var gaman. Stökk meira að segja tvisvar ofan af klettinum og út í Hvítá. Þetta verður pottþétt gert aftur - nú er bara að finna aðeins erfiðari á ;)

Næst á dagskrá fyrir utan vinnu er að fara heim í dýrðina og dásemdina á Happy Days næstu helgi. Er orðin svo spennt fyrir því að komast heim og hitta alla og svo ekki sé talað um hvað verður gaman að komast á alvöru ball :) Mamma á svo afmæli helgina á eftir þannig að ég verð heima í sumarfríi og aldrei að vita nema maður skelli sér í bakstur svona í tilefni af merkisdeginum :)

Búin í prófum!

2007-06-05T10:43:00.000Z

Loksins, loksins, loksins og bara með þokkalegum árangri. Nú er bara að pakka niður, selja eitt stykki búslóð (þekkiði ekki einhvern sem vantar dót??) og njóta lífsins þessa daga sem eftir eru.

Við Christian ætlum að halda sameiginlegt kveðjupartý í kvöld sem verður örugglega bara gaman eins og alltaf, heljarinnar grillveisla og áfengisbyrgðirnar skulu tæmdar ;)

Svo er planið að skoða sig aðeins um í Danmörku og njóta sólarinnar, kem örugglega ekki til með að blogga mikið fyrr en heim verður komið.

Þangað til næst, hafið það gott og verið góð hvert við annað :)

La vida es un carnaval ...

2007-05-28T20:34:00.000Z

... söng vinkona mín hún Celia Cruz hér um árið og ég held að hún hafi nú bara haft rétt fyrir sér. Helginni var eytt í Álaborg hjá Karolinu sem var svo yndisleg að bjóða mér í heimsókn svo ég gæti nú upplifað Karnival a la Álaborg áður en ég fer heim á Klakann.

Á föstudagskvöldið voru það atvinnumennirnir í Karnivalstemningunni sem sýndu listir sínar. Hópar héðan og þaðan úr heiminum sem komu í kuldann í Danmörku til að létta okkur lundina. Es más bello vivir cantando!

Eftir einn ei aki neinn - enda tókum við strætó ;)

Það voru samt rólegheit hjá okkur á föstudagskvöldinu (létum okkur þó ekki vanta í einn öl í tilefni dagsins) því aðalmálið var laugardagurinn þar sem búið var að plana svaka skrúðgöngu og við að sjálfsögðu í búningum svo við myndum ekki missa af neinu.

Rita og Marisol mættar í skrúðgönguna svo fínar og sætar

Við vorum mætt í "mátun" og morgunmat kl. 09.00 á laugardagsmorgun og svo var bara málið að sýna sig og sjá aðra í skrúðgöngunni. Þetta var alveg ótrúlega gaman og fyndið og skemmtilegt, sumir höfðu greinilega lagt mikla vinnu í búningana og voru flottir eftir því. Aðrir kanski ekki alveg jafn vinnusamir en aðalmálið að vera með. Eftir skrúðgönguna var farið "to the park" og þar var dansað og dansað og dansað. Var bara gaman og allt of langt síðan ég hef komist í svona salsa stemningu - pottþétt bætt úr því þegar heim verður komið!

The Bjarnabófar

Thank you for a great weekend Karolina, I had such a good time :) Hope to see you in Iceland soon ;)

Svona verð ég!

2007-05-23T16:56:00.000Z

65 ára gömul kona eignaðist dreng á fæðingadeildinni. Hún fékk að fara heim fljótlega og þegar ættingjarnir komu í heimsókn vildu þeir náttúrulega sjá barnið.
"Getum við séð barnið?" spurðu systur konunnar."Ekki strax" sagði móðirinn. "Ég ætla að laga kaffi og með því fyrst". Hálftíma seinna spurði annar ættingi - "Getum við fengið að sjá barnið núna?" "Ekki strax" sagði móðirinn. Eftir nokkrar mínútur spurðu ættingjarnir aftur, "Getum við séð barnið núna?" "Nei, nei - ekki strax" svaraði móðirinn. Ættingjarnir voru orðnir verulega óþolinmóðir og spurðu aftur - "Jæja,hvenær fáum við að sjá barnið?" "ÞEGAR HANN GRÆTUR" hastaði hún pirruð"ÞEGAR HANN GRÆTUR?" "Af hverju þurfum við að bíða þangað til hann grætur????."ÚT AF ÞVÍ, að ég gleymdi hvar ég setti hann!!"

Átak - Dagur 1

2007-05-22T09:01:00.000Z

Loksins, loksins, loksins er það byrjað og þó fyrr hefði verið! Hafði það af að fara út að hlaupa í morgun og nú skal spikið burt! Náði nú örugglega ekki að hlaupa nema 2x 400 m (ca. 2-3 mín í hvort skipti) en ég labbaði bara þeim mun meira ;)

Ekki annað hægt en að nýta sólina og góða veðrið í það að hreyfa sig og vonandi á þetta eftir að leka af manni. Annars langar mig í Boot Camp í sumar - er einhver með??

Photos for Christian

2007-05-21T19:31:00.000Z

Hope that you are not too bored studying :)

Próflestur og próf í aðalhlutverki þessa dagana, tvö búin og bara eitt eftir. Mannréttindi á dönsku í morgun - fékk að sjálfsögðu einu spurninguna þar sem maður þurfti að kunna á danska kerfið, þekkja gamlar lagabreytingar og svoleiðis skemmtilegt en sem betur fer tókst mér að komast frá því án þess að verða mér til algerrar skammar og fékk þessa líka alveg ágætu einkunn. Annars er skrýtið að reyna að einbeita sér að lærdómnum þegar fólk er farið að huga að heimferð og planlagning kveðjuveislna í hávegum höfð.

Leo og Óli í góðum gír

Leo minn, sæti og góði, hélt afmælis- og kveðjuveislu á föstudaginn og lét maður sig ekki vanta þó ég hafi nú ekki stoppað lengi vegna lærdómsins. Eins og sjá má af myndinni var hann leystur út með gjöfum og sæmdur heiðursorðu sem besti skiptineminn. Þetta var mikil gleði og mikið gaman og verst að þurfa að fara heim svona snemma.

Áróra, Óli og ég

Er öll eitthvað svo meyr og væmin yfir þessu öllu saman. Á svo eftir að sakna allra þessara yndislegu vina sem ég hef eignast síðasta árið - það er ekki annað hægt en að vera þakklátur og glaður með allt þetta góða fólk í kringum sig.

Christian var hress

Fleiri nýjar myndir undir maí 2007, samt ekki mjög margar því ég bara hreinlega missti mig í stemningunni og gleymdi að taka myndir.

Allt tekur enda fyrr eða seinna

2007-05-10T10:39:00.000Z

Er að átta mig á því að ég er alveg að fara að flytja heim. 9 mánuðir búnir að fljúga áfram og nú er ég búin að panta flugið heim og dagsetningin komin. Ég verð að viðurkenna að ég hlakka til en samt verður skrýtið að fara héðan frá Danmörku. Þó svo að það að búa hérna eigi ekki sérstaklega vel við mig, hvorki fjárhagslega (alveg laust við það að það sé ódýrara að búa hér en heima) né persónulega þá hef ég nú haft það betur en margur og svo hef ég kynnst svo mikið af skemmtilegu fólki - og reyndar líka ekki svo skemmtilegu fólki en ég þarf aldrei að hafa samband við það meir ;)

Ég hlakka svo til að fara að vinna, að fá Önnu Maríu mína í heimsókn, að fara ísrúnt og í sund með Völlu minni, að hitta dömurnar í hláturskasti, að komast í gott spjall og skemmtilegheit hjá "ðí eisgardens", að knúsa alla villingana (ég sá voða lítið af þeim þegar ég kom heim), að fara í löns með lögfræðiskvísunum eða bara að njóta sólarinnar á austurvelli, að fara heim á Káta daga og síðast en ekki síst þá hlakka ég svo til þess að blokkin mín verði með fegurri blokkum bæjarins og ég er alveg að fara að flytja aftur í hana :)

Annars eru voða miklar pælingar í gangi varðandi sumarið. Verð að sjálfsögðu að vinna í ráðuneytinu "mínu" en er mikið að spá í hvort það gæti mögulega verið skynsamlegt að verða sér úti um kvöldvinnu svona til þess að minnka mínusinn aðeins ;) Ég veit bara ekki hvers konar vinna það ætti að vera því ég nenni ekki að vinna á veitingastað eða bar og ekki einu sinni þó ég fái borgað fyrir það ;) Svo þarf ég eiginlega að fara að hreifa mig í sumar líka því þrátt fyrir miklar yfirlýsingar um annað þá hef ég ekki hreift á mér rassgatið síðan ég flutti til Danmerkur. Hér hjóla allir eins og geðsjúklingar en mér dettur það hins vegar ekki til hugar, finnst það með eindæmum leiðinlegt og hef ekki stigið á hjól síðan dekkin á gamla bleika hjólinu mínu bráðnuðu þegar kveikt var í bragganum hans pabba í gamla daga. Fæ seint fullþakkað þeim sem stóð fyrir því - sorrý pabbi minn, ég veit maður má ekki segja svona ;)

Hér rignir bara og rignir þessa dagana en það kemur ekki að sök því á mínu heimili er tekin við baráttan við bækurnar. Síðasta prófið 4. júní og þá verður nú heldur betur gaman. Svo þarf ég bara að fara að pakka niður og selja allt dótið mitt og ferðast svo aðeins um Danmörku áður en ég kem heim.

Júróvisjón í kvöld, væri svo til í að vera Laufey sem er í Helsinki núna og að sjálfsögðu löngu búin að tryggja sér miða á keppnina :)

Kapseladsen og afmælispartý

2007-05-06T18:35:00.000Z

Allt að gerast og enginn tími fyrir lærdóm, verður fróðlegt að sjá hvernig útkoman verður úr prófunum eftir enga lærdómsnennu þessa önnina og hvað þá núna þegar sólin er farin að láta sjá sig.

Á fimmtudaginn var það Kapseladsen eða Boat Race sem var aðalmálið og við létum okkur sko ekki vanta enda veðrið gott og ekki oft sem staðið er fyrir skemmtunum sem þessum hér við háskólann. Við vorum nú reyndar meira í því að njóta sólarinnar heldur en að lifa okkur inn í keppnina en það kom ekki að sök og var keppnin (já eða sólbaðið) hin besta skemmtun.

12.000 manns saman komin að fylgjast með deildunum keppa innbyrðis í "boðróðri" - þetta byrjaði þannig að liðin í fyrsta riðlinum kynntu liðin sín með ýmis konar gjörningum, Turtles mættu á svæðið og svo voru einhverjir með úlfalda og þar fram eftir götunum. Þegar öll liðin í riðlinum höfðu kynnt sig tók við kappróður þar sem farið var frá einum bakka háskólatjarnarinnar yfir á annan, þar var drukkinn bjór og snúnir 10 hringir umhverfis flöskuna og svo róið aftur til baka yfir á hinn bakkann. Til að gera langa sögu stutta þá endaði þetta með því að læknadeildin stóð uppi sem sigurvegari og hlaut hið gyllta bekken.

Við Áróra í sólinni á Kapseladsen

Óli átti svo afmæli þann 1. maí og var haldin afmælisveisla í tilefni þess á föstudaginn. Boðið var uppá þessa fínu kokteila og grillað í góða veðrinu. Eftir að sólin var horfin úr garðinum var haldið inn þar sem stuðið hélt áfram fram eftir nóttu, með dansi og mikilli gleði. Við gerðum svo allt brjálað á barnum þar sem menn dönsuðu upp á borðum og héldu ekki heim fyrr en undir morgun. Ég hló svo mikið að ég var með strengi í maganum daginn eftir og gott að taka eina svona skemmtun fyrir próflesturinn en eftir hann er ég ansi hrædd um að ég verði búin að gleyma hvað skemmtun er.

Óli afmælisbarn og Jón Anton með fína gjafavoucherinn

Lærdómurinn hefur nú tekið völdin enda kominn tími á ef ekki á illa að fara. Langar nú reyndar voða mikið til að sleppa prófinu sem ég á að taka á dönsku en get varla farið að láta spyrjast út um mig að ég sé alger aumingi - hvað með það þó maður skilji ekki almennilega hvað þeir meini með einni spurningunni, bara sleppa því að draga hana!

Búin að setja inn nýjar myndir undir maí 2007.

Det var hyggeligt

2007-04-30T19:25:00.000Z

Já, við hugguðum okkur (d. hygge sig) sko aldeilis um helgina. Stefnan var tekin á Lønåvej á föstudaginn með Áróru og börnunum, í afslappelsi, lærdóm, sólbað og huggulegheit. Það er óhætt að segja að við höfum notið lífsins í þessa þrjá daga og lifað eins og hefðarfólk :)

Hvern hefur ekki dreymt um að búa á herragarði umvafinn sveitinni og náttúrunni, getað málað myndir eða unnið annars konar listaverk, eldað góðan mat og borðað hann undir tré í garðinum, kveikt varðeld á kvöldin eða sitja við arineld með góða bók eða við gott spjall - þannig var helgin hjá mér ef frá er talinn listadraumurinn en aðstaðan var þó fyrir hendi. Bíltúrar til nærliggjandi þorpa og bæja enda veit ég fátt betra en að skoða skemmtileg, krúttleg og jafnvel gamaldags lítil þorp. Það er eitthvað svo sjarmerandi við þau og svo heimilislegt og góður plús ef maður finnur genbrug búð þar sem hægt er að týna sér tímunum saman, minnir svolítið á ömmubúð heima á Þórshöfn.

Takk elsku Áróra, Ásgeir Karl og Eva Katrín fyrir yndislega helgi :)

Næst á dagskrá er svo "Kapsejladsen" á fimmtudaginn eða The Boat Race eins og það útleggst á skiptinemamáli ;) Það verður eflaust mikið fjör og mikið gaman.

Búin að setja inn tvo nýja myndapakka, annars vegar úr afmælinu mínu og svo hins vegar myndir frá Lønåvej :)

Sumarið er komið, svona á það að vera

2007-04-22T18:56:00.000Z

Laufey er búin að setja mig í kommentabann á síðunni sinni vegna bloggleti minnar undanfarið og því ekki annað hægt en að henda inn einu bloggi, svona í tilefni dagsins og sem þakkir fyrir manninn sem hún sendi mér í afmælisgjöf ;) Það er ekki að spyrja að því að hún veit upp á hár hvað mér er fyrir bestu; hann er dökkhærður, herðabreiður, með lopapeysuna upp úr nærskyrtunni og það sem er allra best, úr pappír! Held ég haldi þessum enda hangir hann fínn og sætur uppá ísskáp og er ekki með neitt vesen ;)

Er reyndar farin að halda að þetta sé eitt allsherjar plott allra í kringum mig og hefur staðið yfir síðan fyrir páska! Já, mig er nú farið að gruna ýmislegt! Þannig er nefnilega mál með vexti að foreldrarnir urðu svona líka ánægðir með málsháttinn í páskaegginu mínu (sem Anna María laumaði í innkaupakerruna mína í Bónus á Akureyri) - Betur draga tveir fuglar til hreiðurs en einn! Veit ekki hvað foreldrarnir hafa borgað Önnu Maríu, Bónus og Nóa og Síríusi fyrir þennan málshátt en eftir áralangar og áranguslausar tilraunir til þess að ég gangi út, eru úrræðin farin að bera vott um mikla örvæntingu. En þau þurfa ekki að örvænta úr þessu, þökk sé Laufey ;)

Íslandsferðin lukkaðist svona líka vel, var eiginlega bara alveg fullkomin :) Eftir að hafa vigtað hverja einustu flík og hvern einasta skó sem ofan í ferðatöskuna fór var haldið heim þar sem kápur og vetrarflíkur komu að góðum notum í kuldanum og vetrinum sem enn var á Íslandi.

Anna María mín bauð upp á gistingu í 2 nætur á Akureyri og var heldur betur dekrað við mig - henni hefur því verið fyrirgefið fyrir að hafa valið páskaeggið ;) Leið eins og drottningu eftir 2 daga og ekki versnaði það þegar ég komst heim í dýrðina og dásemdina til mömmu og pabba. Gott að borða, hestbak, ræktin og sundlaugin gerðu þetta að algeru fríi og svo var nú skemmtunin ekki langt undan. Litum aðeins á Eyrina á föstudags- og laugardagskvöld og geri aðrir betur. Skemmti mér svona líka vel bæði kvöldin og æðislegt að hitta allt þetta fólk sem ég hef ekki séð í svo langan tíma.

- systur mættar á barinn í öllu sínu veldi-

Páskadagur byrjaði eins og áður sagði með þessum líka fína málshætti sem vakti mikla lukku meðal allra sem hann lásu og var hengdur upp á ísskápinn til áminningar. Héldum svo í afmæli til Henrýs Jarls sem varð 1 árs og alltaf jafn sætur :) Borðaði svoleiðis yfir mig af kræsingunum þannig að ég hélt að ég myndi springa (það rétt slapp til - maður er nú orðinn skjólgóður af danmerkurdvölinni og ekkert betra en að komast í íslenska veislu :) Að sjálfsögðu var páskalæri í kvöldmatinn með tilheyrandi meðlæti og dásamlegheitum.

Eina sem mér fannst dálítið skrýtið við það að vera heima var að Joe og Gló eru bæði flutt að heiman - fullt af fullorðinsstigum sem þau fengu við það. Húsið svo sem ekki tómlegt en skrýtið að vera heima hjá sér og þurfa að fara út úr húsi og í heimsókn til systkinanna.

Reykjavík var aðeins minni afslöppun en dýrðin og dásemdin en skemmtileg eins og alltaf :) Markmiðið var að reyna að hitta sem flesta og gekk það að mestu leyti eftir. Kani fram á nótt á Grandaveginum, kaffi með lögfræðiskvísunum, búðarráp með ömmu og Ósk, lit og plokk og dekur, íbúðarúttekt á nýju íbúðinni hjá Völlu minni og gott spjall, ferðafundur vegna Barcelonaferðar með dömunum í S3, kaffi hjá Gumma og Gauju í nýju íbúðinni og svo loks matarboð í góðum félagsskap hjá Svönu og Binna, eins og þeim einum er lagið :) Tóta skutlaði mér svo út á völl á sunnudeginum eftir páska og þá var þetta bara allt í einu búið og raunveruleikinn með tilheyrandi bókalestri og prófundirbúningi tekinn við. Verð að viðurkenna að ég var alveg við það að pakka bara niður og fara strax aftur heim, það var svo gaman hjá mér og svo yndislegt að hitta aftur alla sem ég hef saknað svo síðan ég kom til Danmerkur :) Takk öll fyrir að gera þetta dásamlega 12 daga.

Af danmerkurlífinu er það að segja að það gengur sinn vanagang, hitastigið fer hækkandi og einbeitning fyrir skólabókunum fokin út í veður og vind. Ég reyndist verða einu ári eldri en þegar ég kom og í tilefni þess bauð ég krökkunum í íslenska lambalærisveislu sem vakti svona líka mikla lukku :) Afmælissöngurinn sunginn á 4 tungumálum fyrir mig í strætó fullum af fólki sem var bara ekkert vandræðalegt (eða þannig!) og bærinn svo málaður rauður eins og vera ber á tímamótum :)

Búin að setja inn myndir frá páskafríinu en reyni að setja inn myndir frá afmælinu fljótlega. Ekki ólíklegt að þær rati inn næst þegar ég fæ nóg af lestrinum.

Löggur og bófar

2007-03-29T18:18:00.000Z

"Lögg' og bóa" var vinsæll leikur í Sunnuveginum í gamla daga, svo sem ekki skrýtið þar sem strákar voru í meirihluta í götunni en ástæðan fyrir því að ég lék hann oftar en ekki sú að stundum var dálítið langt að labba alla leið yfir lækinn til þess að komast í barbí ;)

Á vef Nyhedsavisen í dag kemur fram að börn á leiksólum Kaupmannahafnarsvæðisins leiki nú nýja útgáfu af þessum leik sem nefnist á frummálinu "Politiet mod Ungdomshuset" eða Lögreglan á móti Ungsómshúsinu á hinu ástkæra ylhýra. Í þessari nýju útgáfu eru mótmæli og vegatálmar í aðalhlutverki og barnsraddir sem kalla "lögregluofbeldi" heyrast inn á milli!

Væri svo miklu meira en til í að vera fluga á vegg þegar þessi leikur er leikinn :) Bara fyndið og jafnvel svolítið krúttlegt hvað þau eru fljót að grípa það sem gengur á í samfélaginu hverju sinni ;)

Vildi annars bara minna á að ég er að koma heim eftir 5 daga!

Home Sweet Home

2007-03-27T15:08:00.000Z

Jamm, breytt plön og ég á leiðinni heim í páskafríinu :) Ætla meira að segja að fara alla leið í dýrðina og dásemdina til mömmu og pabba og láta stjana aðeins við mig ;)

Allavega, kem heim um kvöldið 3. apríl og fer svo á Akureyri, Valla mín svo góð að ætla að kippa mér með þeim hjónakornum og Anna María mín búin að búa til pláss fyrir mig hjá sér. Við ætlum svo að vera mestu pæjurnar á Eyrinni í 2 daga, fara á kaffihús og gera allt sem okkur dettur í hug.

Vantar svo reyndar far heim í dýrðina og dásemdina á föstudaginn langa en viss um að Guðmundur Hólm sér mér fyrir eðalvagni ef það reddast ekki öðruvísi ;) Hlakka svo til að koma heim og hitta fólkið mitt, slappa af og borða góðan mat og fara í sund og fara út að hlaupa og ... og... og. Allt of langt síðan ég hef verið heima (næstum 1 og 1/2 ár) og þetta verður æðislegt :) Eygló, er Odinn reddí fyrir partý???

Stefnan er svo tekin á Reykjavíkina við tækifæri svo ég missi nú ekki af neinu ;) Vonast til þess að hitta sem flesta og gera sem mest :)

Hef svo líka sett inn nýjar myndir undir mars 2007 !

Hlakka til að sjá ykkur!

Allt að gerast

2007-03-22T12:22:00.000Z

Skattskýrslan alveg að klárast - sem betur fer ! Finnst mjög einkennilegt af hverju starfsmenn ríkisskattstjóra hafa aldrei verið tilnefndir til sérstakra verðlauna fyrir einstaka þjónustulund og glaðværð. Þurfti nauðsynlega að hafa samband við skattinn svo ég væri nú með það 100% pottþétt hvað ég þyrfti að senda með skattaskýrslunni minni. Konan sem ég talaði við í sérstöku þjónustuveri sem sett hefur verið á laggirnar vegna skattskila landans var svo HRESS að ég hélt hreinlega að hún myndi hrökkva uppaf úr leiðindum á meðan hún svaraði þeim spurningum sem ég hafði. Í stað þess að lesa yfir konugreyinu um þjónustörf og þjónustulund setti ég í gleðigírinn og hef sjaldan á ævi minni verið jafn kurteis og indæl og ánægð með lífið og tilveruna sem endaði með því að ég þakkaði konunni vel og innilega fyrir veitta aðstoð og óskaði þess að hún ætti nú góðan dag :)

Gleðilegri fréttir eru hins vegar þær að dömurnar eru búnar að bóka ferð í Barcelona í byrjun september :) Aðeins 162 dagar í brottför og ekki seinna vænna en að fara að huga að undirbúningi! Eðal ferðafélagar sem gera það að verkum að ferðin getur ekki annað en heppnast frábærlega - Spurning hins vegar um hvort gera þurfi borgaryfirvöldum viðvart vegna inrásarinnar þar sem við eigum eftir að mála bæinn rauðan með tilheyrandi "dömulegum" hlátrasköllum og látum :)

Svo má ekki gleyma litla prinsinum þeirra Jóhönnu og Guffa sem kom í heiminn í gær, svolítið löngu fyrir áætlaðan tíma og var hann bara 6 merkur elskulegastur. Til hamingju með viðbótina við fjölskylduna elskurnar, vona að allt gangi vel og hlakka svo til að koma heim og fá að knúsa ykkur öll :)

Þangað til næst, verið góð hvert við annað og njótið þess að vera til :)

Lærdómurinn enn einu sinni

2007-03-18T12:09:00.000Z

Ójá 2 bls. lesnar í evrópurétti í dag - meira en lesið hefur verið í því ágæta fagi síðastliðinn mánuðinn - Batnandi mönnum (konum) er best að lifa ;) Hins vegar búin að afreka það að setja inn myndir frá Eyglóarheimsókninni og bara fallegar myndir þar á ferð eins og vanalega.

Hadda átti afmæli í gær! Til hamingju með daginn gamla mín, vona að þið hafið getað fengið ykkur við því í tilefni dagsins ;)

Spánn hefur vinningsstöðu í páskafrís-samkeppninni, það er hvort eð er orðið svo stutt þangað til ég kem heim. Ég veit þið saknið mín ógurlega (enda þarf ég að hafa mig alla við svo ég geti svarað þessum gríðarlega fjölda kommenta á síðunni) en ég verð að hryggja ykkur með þeim fréttum að eins og staðan er núna hlotnast Santiago de Compostela væntanlega sá heiður að vera nærveru minnar aðnjótandi yfir páskahátíðina. Svo fékk ég líka páskaegg frá Glóunni minni þannig að ég þarf engu að kvíða ;)

Shakira, Shakira!!

2007-03-15T10:45:00.000Z

Þá er Glóan mín farin og ég ein í kotinu aftur. Tíminn vægast sagt búinn að fljúga áfram og búið að vera svo gaman hjá okkur. Lydia, vinkona mín frá Spáni, kom á miðvikudaginn síðasta og var hjá okkur fram á sunnudag þannig að það er búið að vera mikið líf og fjör.

Tónleikarnir með Shakira standa að sjálfsögðu uppúr enda bara flottust :) Lögðum í hann upp úr hádegi á föstudaginn (sumar hressari en aðrar eins og gengur) á fáknum hennar Áróru sem skilaði okkur örugglega uppá hótel í Álaborg. Þar lágum við nú bara í leti fram að tónleikunum enda tilgangurinn með ferðinni að slappa af og njóta þess að vera til. Lentum að sjálfsögðu í röð dauðans til þess að komast inn í Gigantium þar sem tónleikarnir voru haldnir en þetta hafðist á endanum og tók þá við biðin endalausa eftir því að tónleikarnir byrjuðu. Komum okkur vel fyrir, í miðri þvögunni, með gott útsýni á sviðið því við ætluðum sko ekki að missa af neinu og svo biðum við og biðum og biðum og svo mætti upphitunaratriðið sem var ekki alveg að gera sig og svo biðum við og biðum og biðum eftir aðal atriðinum. Gáfumst upp á að bíða í þvögunni áður en hún mætti á sviðið enda gamlar konur komnar með í bakið af því að standa í svona langan tíma og geta varla hreyft sig ;) Öll biðin var svo fyrirgefin þegar Shakira vinkona mín mætti loksins á sviðið og söng svona líka fallega og dansaði fyrir allan peninginn. Óvæntur bónus við tónleikana að hitta þar Þórhöllu frænku, Öddu og Evu Dögg sem áttu ekki von á að hitta okkur frekar en við þær :) Verst að þær skyldu ekki geta komið með okkur í bæinn eftir tónleikana en það hlýtur að koma annað tækifæri til þess ;) Takk fyrir kvöldið stelpur, æðislegt að hitta ykkur svona óvænt :)

Laugardeginum var svo eytt að mestu í Álaborg þar sem við fundum þetta ótrúlega kósý kaffihús með þvílikt girnilegum matseðli og góðum mat (eitt af því sem vantar í Árósum). Eftir kósýheitin átti svo aldeilis að taka búðarrápið með trompi en okkur var því sem næst hent út úr búðunum því í Álaborg loka þær enn fyrr en í Árósum!! Létum það ekki á okkur fá og fundum búðirnar sem voru opnar til fimm og keyptum og keyptum fyrir allan peninginn :) Drifum okkur svo heim enda ekki seinna vænna því búið var að boða til partýhalds í Skejbytoften og átti eftir að gera og græja. Eins og alltaf var bara gaman að fá allt liðið í partý (allavega þangað til daginn eftir) og bærinn klikkaði ekki frekar en vanalega. Kebab-ið setti svo punktinn yfir i-ið og endaði gott kvöld.

Kaffihúsaferð á sunnudaginn þar sem flestir komu til að kveðja Lydiu. Djúpar rökræður um siðferðileg málefni sem enduðu á að fólk féllst á að vera sammála um að vera ósammála. Við systur fórum svo út að borða á mánudag og vildi svo vel til að við sáum fullt af búðum sem við höfðum ekki komist yfir að fara í þannig að verkefni þriðjudagsins voru næg ;) Vorum svo boðnar í dýrindis pestókjúkling til Áróru á þriðjudagskvöldið og ekki var verra að fá heimagerða ostaköku í eftirmat. Niðurpakk þar sem ég gat komið nokkrum flíkum með í yfirvigtartösku Glóunnar minnar og svo var hún bara farin á miðvikudaginn og skildi mig aleina eftir. Takk fyrir komuna engillinn minn, hlakka til að sjá þig aftur í Reykjavíkinni í sumar :)

Set inn myndir af herlegheitunum síðar - nenni því ekki núna ;)

Shop untill you drop!!

2007-03-07T21:11:00.000Z

Allar svo appelsínugular og fínar eftir verslunarferð gærdagsins, markmiðið var að kaupa ekkert svart og var staðið við það að mestu leyti ;) Vorum mjög þreyttar þegar heim var komið enda ekki nema fyrir hörðustu atvinnumenn að versla í 8 tíma streit og ekki verið gert hér á bæ síðan við Anna María hreinsuðum út úr öllum betri búðum Árósa ;)

Aros listasafnið varð svo nærveru okkar aðnjótandi í dag en þar stendur yfir núna sérleg sýning á verkum Paul McCarty, sem er að mínu mati alvarlega veikur í höfðinu. Skil ekki hvernig sumt fólk hugsar og get bara ekki séð listina við það að sýna hjólhýsi útatað í Hersey's sírópi og myndband þar sem sýnt er hvernig 3 manneskjur maka á sig sýrópinu og velta sér um allt hjólhýsið og það var þó það skársta í sýningunni, allt svo skítugt og blóðugt og ógeðslegt. Frumlegheitin þvílík að ég sá ekki alveg listina.

Stefnan tekin á Álaborg á föstudaginn þar sem við systur, ásamt Áróru og Lydiu, ætlum að hrista mjaðmirnar með Shakiru - það verður bara gaman - Shakira, Shakira!!

Miklar pælingar í gangi varðandi páskana, er jafnvel að spá í að fara heim, þ.e. Reykjavíkur heim en ekki alveg heim heim þó það sé allt of langt síðan ég var heima síðast.

Svo á hún Stína mín elskulegust afmæli í dag, orðin 30 ára skvísan :) Til hamingju með daginn dúllan mín, vildi svo óska að ég kæmist norður í afmælið um helgina en við fögnum bara all rækilega í sumar í staðinn :)

Magnað

2007-03-01T21:57:00.000Z

Þegar manni finnst maður vera búinn að eyða tæpu ári í tóma vitleysu þá er ekki gaman að vera til ! Það eina í stöðunni virðist hins vegar vera að læra af reynslunni og reyna að muna næst að maður er orðinn of gamall fyrir svona unglingaævintýri.

Glóan mín að koma ekki á morgun, ekki hinn, heldur hinn :) Það verður mikil gleði í gullulandi þá :)

Ferðahugur

2007-02-25T13:10:00.000Z

Sem mótmæli við flensunni, sem virðist hafa yfirtekið líf mitt þessa dagana, dreif ég mig út í fyrradag og tók nokkrar myndir af snjónum sem hefur sett Danmörku á annan endan. Ekkert nema gott um það að segja enda sjaldan verið jafn fegin því að komast út úr húsi ;) Mjög svo fúl yfir því að hafa eytt heilli viku í þessa vitleysu og enn fúlli þegar ég fór að pæla í því hversu mun betur tímanum hefði verið varið hefði ég bara ákveðið að skrópa í skólann og drífa mig til útlanda - eitthvert þar sem sólin skín nota bene!

Nú hefur flensan að mestu leyti yfirgefið svæðið en mig langar enn til útlanda! Páskarnir á næsta leyti og mig langar svooo að gera eitthvað skemmtilegt - ég meina maður getur nú alveg lesið skólabækurnar í sólbaði ;) Vil því hér með óska eftir ferðafélaga í viku eitthvert þar sem veðrið er gott og sólin skín. Þá vil ég einnig óska eftir vinningi í lottóinu því peningatréð sem óskað hefur verið eftir hefur ekki skilað sér til mín ;)

Glóan mín að koma eftir viku :) Ég hlakka svo til að sjá hana að ég get eiginlega ekki beðið og það er ekki bara af því að hún kemur með allt sem mig langar mest í frá Íslandi (nema fisk - pabbi er búinn að lofa að elda bara fisk handa mér í viku þegar ég kem heim) heldur líka af því að hún er nú einu sinni uppáhalds litla systir mín :) Það er því ekki orðið seinna vænna en að fara að plana sætsíing og komast að því hvað er um að vera í stórborginni Árósum næstu 2 vikurnar.

Úti er alltaf að snjóa

2007-02-23T11:26:00.000Z

Það verður ekki tekið af vinum mínum Dönum að þeir eru algerlega bjargarlausir eftir tveggja daga snjókomu. Það mætti halda að aldrei fyrr hefði fallið svo mikið sem eitt snjókorn á danska jörð. Samgöngur eru lamaðar, fyrirtæki eru lokuð og skólum aflýst vegna "óveðursins" sem lýsir sér í snjókomu og skafrenningi. Ég er ansi hrædd um að Danir hefðu lagst í dvala hefðu þeir fengið vetur eins og við norðlendingar erum vön að fá.

Ég get ekki annað en hlegið þegar ég sé snjómokstursaðferðirnar og hvað þá þegar ég sé menn mætta á svæðið með salt til þess að dreifa yfir snjóinn, því enginn er klakinn. Virðist formúlan vera að á 3 cm af snjó fari 6 cm af salti ;)

Annað sem ég get ekki annað en hlegið að er klámhysterían sem gripið hefur um sig á Íslandi undanfarna daga og þá sérstaklega ummæli talskonu femínistafélagsins á baksíðu moggans í dag: "Okkur finnst þetta frábær sigur fyrir kynfrelsið og mjög gott að sjá þjóðina standa saman um það að hafna kláminu." Svolítið í anda fegurðardrottninganna og alheimsfriðar. Gott að Bændasamtökin eru allt í einu orðin að þjóðinni allri enda þeir einu sem virkilega sögðu nei takk, við kærum okkur ekki um þetta og burt með ykkur ;) Flestir aðrir held ég að hafi séð fáránleikann sem felst í því að ætla að hindra fólk í því að koma til landsins vegna þess að atvinna þess brýtur gegn íslenskum lögum EF hún væri unnin á Íslandi. Auðvitað vill enginn pólitíkus vera fylgjandi klámi opinberlega og auðvitað segja allir að slíkt sé ekki velkomið í okkar heilaga landi en af hverju hafa þeir hinir sömu ekkert sagt eða gert þegar kemur að sölu slíks efnis á Íslandi því þar erum við jú að tala um ólöglegt athæfi ... maður spyr sig.

Snjóstormur

2007-02-21T17:00:00.000Z

Það er ca. 20 cm hár snjór á bílastæðinu fyrir framan íbúðina mína og strákarnir eru búnir að festa Carlsberg trukkinn - og ég er ekki að grínast! Nú djöflast félaginn og reynir að fara annað hvort aftur á bak eða áfram en hann situr sem fastastur - ætli þeir hafi aldrei heyrt talað um skóflur ;) Langar svo að fara út með myndavélina en ætla að reyna að hemja mig - þetta hressir mann annars mjög svo við eftir allt of langa inniveru ;)

Allt í rusli

2007-02-20T21:47:00.000Z

Mál málanna í Árósum þessa dagana er verkfall ruslakarla hjá ákveðnu fyrirtæki sem sendi 2 starfsmönnum aðvörun vegna fjarvista þeirra vegna veikinda og til þess að gera þetta enn meira krassandi fá starfsmenn þessa sama fyrirtækis lægri laun en almennt gengur og gerist í bransanum. Er skemmst frá því að segja að allir starfsmennirnir hafa lagt niður vinnu í mótmælaskyni og hefur rusl í ákveðnum hverfum ekki verið hirt í mjög langan tíma (það finnst allavega fólkinu sem býr við hliðina á ruslahaugunum sem nú hafa myndast). Það er líka svo einkar skemmtilegt við þessa ruslahauga að þeir eru ekki bara fallegir fyrir augað, og þjóna þannig augljósum fagurfræðilegum tilgangi, heldur hafa þeir þá aukaverkun að nú heimsækja haugana þessar líka fallegu rottur og lifa eins og kóngafólk af veitingum þeim sem uppá er boðið - hvað er hægt að biðja um meira!

Þetta ágæta fyrirtæki hefur þó ekki séð sér fært að ganga að kröfum starfsmanna sinna og þeir (þ.e. starfsmennirnir) hafnað þeim sáttatilboðum sem borist hafa. Því hafa ruslakarlar (og væntanlega konur líka) um gjörvalla Danmörku sameinast um að fara í samúðarverkfall þar til úr deilunni leysist. Ég hef hingað til verið svo heppin að rusl í mínu hverfi hefur verið hirt svo ég vona bara að málið verði leyst fyrir föstudag svo vinir mínir, ruslakarlarnir, mæti nú á svæðið eins og venjulega. Ég get svo svarið það að ef það fer að myndast haugur fyrir framan húsið mitt (og hvað þá ef ég sé svo mikið sem eina rottu) þá flyt ég aftur heim med det samme!!!

Er svo loksins búin að setja inn nýjar myndir (undir janúar og febrúar) - Allar svo sérdeilis fagrar og skemmtilegar ;)

Þangað til næst, hafið það gott og passið ykkur á flensunni - hún er leiðinleg ;)

Til hamingju, þú hefur unnið hálskirtla á stærð við golfkúlu!

2007-02-19T20:50:00.000Z

Og í kaupbæti færðu með beinverki sem hverfa ekki þrátt fyrir að fara yfir ráðlagðan dagsskamt af verkjatöflum ... Hata að vera veik - ætla aldrei að verða það aftur!

Þorrablót

2007-02-18T17:28:00.000Z

Þreytt, þreytt, þreytt í dag. Velheppnuð helgi að baki, Friday Dinner með krökkunum á föstudaginn og svo þorrablót Íslendingafélagsins í gærkvöldi þar sem Helga Braga var veislustjóri. Hún er náttúrulega bara fyndin og skemmtileg og var mikið hlegið. Þarf ekki annað en að sjá hana og þá byrja ég að hlægja - hún er bara dásamleg. Hljómsveitin Sixties hélt svo uppi fjöri fram á nótt og tók þá við einkar "skemmtileg" barátta um að ná leigubíl niður í bæ. Við Soffía máluðum bæinn aldeilis rauðan og hefur annað eins ekki sést í háa herrans tíð. Mikið rosalega hló ég mikið og mikið var allt þetta fólk heppið að ég skyldi hafa lagt leið mína í bæinn ;)

Eins og mér finnst gaman að fara á þorrablót heima (og nú í Árósum líka) og reyni að fara ef ég mögulega get þá verð ég að viðurkenna að mér finnst þorramatur ógeðslegur. Skil bara ekki af hverju það er verið að borða skemmdan mat þegar það er nóg til af góðum mat. Svo ekki sé talað um það að fólk er að borga fyrir allan skemmda matinn - ansi hrædd um að ég þyrfti að fá væna summu til þess að fást til þess að láta þetta ofan í mig. En þar sem ég er svo sem ekkert að deyja úr hor þá gerir nú ekki mikið til þó maður gúffi ekki í sig kræsingunum kvöld eftir kvöld. Þetta endaði með gríðarmikilli skemmtun og miklum hlátri þar sem nokkrir unnu þvottavél (aðallega Soffía) og aðrir ekki ;)

Annars lítið að frétta, lestur og aftur lestur á dagskránni - vil ekki eiga hann eftir þegar Glóan mín kemur loksins til mín :) Hlakka svo mikið til að fá hana til mín svo ekki séð talað um að hrista mjaðmirnar með Shakiru, stórvinkonu okkar ;)

Reyni að setja inn myndir á morgun - búin að taka helling en hef ekki haft tíma til að setja þær inn.

Take That í Horsens

2007-02-10T20:44:00.000Z

Já, það er sko öllu tjaldað til í Melodi Gran Prix og ef menn þurfa að fá Take That til að vera rúsínan í pylsuendanum þá er það bara gert. Finnst þeir nú aðeins hafa látið á sjá síðan mér fannst þeir æði (eins gott að ég er alltaf jafn vel haldin) og að sjálfsögðu vantar aðalmanninn hann Robbie en þetta var flott hjá Dönunum að gera þetta aðeins meira "spænnende".

Verður að segjast að hér er undankeppni júróvisjón aðeins metnaðarfyllri heldur en heima. Sjóið er flottara, lögin eru betri og síðast en ekki síst eru hér flytjendur sem halda lagi og tóni, eitthvað sem mér fannst eiginlega frekar vera undantekningin heima. Ekki það að það eru alveg ca. 5 lög sem hlusta má á ;)

Framlag Dana í Helsinki í ár verður DQ með lagið Drama Queen. Lagið er bara alveg ágætt, alvöru drag drottning á sviði með öllu tilheyrandi (þ.á.m. kórónunni á sviðinu). Vonandi bara að þessi drottning leiki ekki eftir Silvíustælana sælla mininga ;)

Stundum verður manni orða vant

2007-02-08T22:28:00.000Z

Var að horfa á myndina The Road to Guantanamo og ég get eiginlega ekki lýst því hvernig mér líður. Held að allir verði hreinlega að sjá hana til að mynda sér sína eigin skoðun. Þvílíkur skepnuskapur og þvílíkir djöfulsins aumingjar sem bera ábyrgðina á þessu. Og sumu fólki finnst þetta bara í lagi (og jafnvel nauðsynlegt) af því að tilgangurinn er sá allra mikilvægasti - all is fair in war agains terror. Af hverju hafa allir þessir "hryðjuverkamenn" (sem sumir hafa verið þarna í fleiri ár) ekki verið sóttir til saka og dæmdir ? Maður spyr sig ...

Hvað er að frétta?

2007-02-08T09:39:00.000Z

Hér í Danmörku eru allir fjölmiðlar uppfullir af þeirri stórfrétt að Alexandra prinsessa, fyrrverandi eiginkona Jóakims prins, ætli að gifta sig aftur og hættir því að vera hluti af dönsku kóngafjölskyldunni. Myndir af þeim skötuhjúum hafa verið birtar og sagan rakin frá A-Ö af öllum helstu sérfræðingum um málefni konungsfjölskyldunnar. Merkilegt að við þessar breytingar þarf Alexandra að fara að greiða skatta af sínum tekjum eins og aðrir "venjulegir" borgarar svo ekki sé talað um virðisaukaskattinn af öllu því sem hún verslar. Ég myndi nú nýta tímann fram að brúðkaupinu í verslunarleiðangur ef ég væri hún ;)

Ekki jafn skemmtilegar fréttirnar að heiman. Finnst ég varla sjá annað en umræður um kynferðisbrot eða annað ofbeldi í einni eða annarri myndi. Þetta Breiðavíkur mál er meira en lítið óhugnalegt en vonandi að málið verði rannsakað og að þeir sem þarna báru ábyrgð sjái sóma sinn í því að viðurkenna að kerfið hafi brugðist þessum drengjum og að reynt verði að bæta þeim það tjón sem þeir urðu fyrir, ekki síst þá sálarlegu áverka sem svona brot skilja eftir sig.

Finnst annars merkilegast af því sem ég hef séð í umræðunni að eftir Kompásþáttinn margumtalaða séu foreldrar farnir að leika tálbeitur fyrir barnaníðinga á internetinu. Nú er ég enginn sérfræðingur í barnauppeldi (og verð það vonandi ekki á næstunni) en ég hefði haldið að tímanum væri betur varið með börnunum. Ég er bara svo vitlaus að ég held að hægt sé að koma í veg fyrir allavega hluta af þessum tilvikum sem eru í umræðunni í dag með því að foreldrar taki sig til og ræði opinskátt við börnin sín. Ég veit að þetta hljómar mjög barnalega og ég veit að vandamálið er flóknara en svo, en ég er þess fullviss að slíkt myndi bera árangur. Börn eru ekkert vitlaus og það má alveg útskýra fyrir þeim hluti og þau mega alveg vita að heimurinn er ekki fullkominn. Ég þykist vita að flestir foreldrar roðni og bláni þegar á að fara að ræða þessa hluti en tel að það sé ekki til of mikils ætlast að krefjast þess af foreldrum að þau taki þátt í baráttunni og leggi sitt af mörkunum. Það er ekki nóg að hneykslast bara og tala um hversu mjög dómstólar eigi að skammast sín.

Stemning

2007-02-06T16:23:00.000Z

Það er alltaf hressandi að sitja í strætó á leiðinni heim með þær vinkonur ilmvatnsfýlu og sígarettu í sætinu fyrir framan - alveg var ég við það að gubba þegar ég loksins fór út! Er eitthvað flókið við það að skilja að þó ilmvatnið komi í flösku á ekki að tæma hana þegar það loksins er notað .... jakk, mér er ennþá óglatt ;)

Samt bara gott að vera byrjuð í skólanum aftur :)

Bored to death

2007-02-01T10:07:00.000Z

Leiðindastuðullinn er í botni akkúrat núna! Hver nennir að vera í 10 daga fríi - eftir 4 þá er maður búinn að öllu sem manni dettur í hug að gera og því 6 dagar sem fara í tiltekt eða þrif eða bara almenn leiðindi og flakk um veraldarvefinn. Ég er sem sagt búin að lesa bókina sem Laufey lánaði mér (kláraði hana strax á fyrsta degi nota bene), fara í bæinn, hitta krakkana í lunch, gráta yfir úrslitum handboltaleiks, fara út að hlaupa (og ef ég er byrjuð á því þá er ég ansi langt leidd í leiðindunum), fara í ljós og svo fleira minna spennandi.

Skóli á mánudaginn - gæti bjargað geðheilsunni að fara að læra ;)

Nú get ég allt sem ég vil ;)

2007-01-24T15:08:00.000Z

Já, fyrst mér tókst að standast munnlegt próf á dönsku og bara með fínustu einkunn, þar sem ég var ekki einu sinni lægst, þá held ég að núna séu mér allir vegir færir ;) Hefði reyndar alveg viljað vera fluga á vegg þegar ég var inni í prófinu - það gekk á ýmsu við framburð og útskýringar en þetta hafðist og þegar ég var búin að segja aktindsigt nægilega oft þá var framburðurinn barasta orðinn nokkuð réttur ;)

Anja bjargaði mér svo eftir prófið með því að drífa mig með sér í kaffi sem hefur gert það að verkum að ég er ekki alveg ónýt enda komin á fætur á mjög svo ókristilegum tíma. Merkilegt að á öllu þessu háskólasvæði sé ekki hægt að finna almennilegt kaffihús. Þá er nú gott að eiga vinkonur sem búa í næsta húsi við háskólann og gera líka svona gott Latte.

Næst á dagskrá er að þrífa höllina, setja í þvottavél eða 4, kaupa skólabækur og byrja að lesa fyrir næstu átök. Annað átak komið í gang af einskærri nauðsyn en átakið mun kallast heilsuátak og hefur ekki gengið sem skyldi síðasta árið (eða 3). Nú er hins vegar að duga eða drepast því ekki viljum við hafa bingóið í sviðsljósinu á Þorrablóti íslendingafélagsins og svo verður maður nú að vera til stakrar prýði og fyrirmyndar í dömuferðinni sem fara á til Barcelona í haust :) Er eðlilegt að vera strax kominn með fiðring í magann fyrir ferðinni - það er nú ekki á hverju ári sem bóndinn fer í lest í fyrsta skipti á ævinni ;)

Loksins kominn snjór

2007-01-22T10:26:00.000Z

Það var bara alhvít jörð þegar ég fór á fætur í morgun, mér til mikillar gleði. Búnir að lofa og lofa snjókomu strákarnir í veðrinu og svo hefur bara rignt og ringt og ringt og ringt.

Er nett að brjálast úr hlátri yfir snjómokstursaðferðum húsvarðarins míns sem er búinn að eyða mestum hluta morgunsins í að fjarlægja 3 cm jafnfallna snjóinn frá útidyrahurðum og af gangstígum hér í næsta nágrenni. Gamli nýtur við þetta verkefni grænnar vígalegrar gröfu og nú mokar hann svo og mokar - bara krúttlegur - er svolítið eins og lítill strákur sem fengið hefur nýtt dót í jólagjöf og getur ekki beðið eftir að prófa það ;)

Mikið ógeð fyrir próflestri einkennir annars stemninguna þessa dagana, mikið rosalega verð ég fegin þegar þetta er búið. Verður mjög fróðlegt að sjá hvernig fer með strætóferðir ef það snjóar meira næstu daga - kannski þarf ég að huga að því að labba í prófið ;)

Er maður orðinn gamall eða bara latur??

2007-01-20T19:08:00.000Z

Já maður spyr sig! Búin að lesa í um 10 tíma og er gjörsamlega búin á því! Langar mest til þess að skríða undir sæng og fara bara að sofa. Í þá gömlu góðu daga þegar ég var að lesa fyrir almennuna (og flest próf sem fylgt hafa á eftir) gat ég lesið frá kl. 8 á morgnanna til kl. 22 á kvöldin þó með hádegis- og kvöldmatarpásum. Er maður virkilega orðinn svo gamall að maður getur ekki "unnið" nema í 10 tíma á dag - frekar vandræðalegt!

Annars mest fúl yfir því að ég skyldi ekki geta horft á Ísland - Ástralía á í gegnum netið en beinum útsendingum frá HM í handbolta, yfir RÚV vefinn, er einungis hægt að sjá innanlands! Liggur við að ég fari bara að halda með Danmörku - þeir eru allavega með nokkra sæta í liðinu ;)

Áfram Ísland!

2007-01-20T11:07:00.000Z

Það er að sjálfsögðu allt að gerast í próflestrinum, þ.e.a.s. allt nema lestur ;) Held í vonina að kennarinn minn aumki sig nú yfir mig og hleypi mér í gegn - íslenski hreimurinn á dönskunni minni fær vonandi einn heilann og þá ætti nú ekki að vera mikið mál fyrir gömlu að muna rest ;)

HM í handbolta byrjað og strákarnir okkar að spila fyrsta leikinn í dag. Ég má að sjálfsögðu ekki missa af því, enda getur það ekki verið annað en gott fyrir lærdóminn, að koma sér í baráttuham yfir sjónvarpinu :)
[Uppfært kl. 16.00 - Hvað er málið með þetta???!! "Bein útsending á leikjum frá HM í handbolta er aðeins aðgengileg innanlands. Búast má við miklu álagi á streymivef Sjónvarpsins á meðan á sýningu HM stendur." Gott að vera íslendingur í útlöndum núna!]

Undankeppni Eurovision er annað á dagskrá sjónvarpsins í dag sem ekki má missa af. Það borgar sig ekki að lesa yfir sig - það getur verið mannskemmandi ;)

Svo er nú alltaf gaman að fá gleðifréttir að heiman - Rúnar og Hilma eignuðust prinsessu númer 2 þann 17 janúar, alveg ofboðslega fallega :) Til hamingju með það stóra fjölskylda :)

Til hamingju! Þú hefur unnið þvottavél ....

2007-01-19T09:44:00.000Z

Orðið greindarvísitöluskertur hefur í dag öðlast nýja merkingu. Það fyrsta sem ég rak augun í þegar ég skoðaði mbl.is í morgun var sú stórfrétt að Ólafur Geir Jónsson, fyrrverandi fegurðardrottning í nokkra daga, hefur fengið gjafsókn til þess að höfða skaðabótamál gegn forsvarsmönnum Fegurðarsamkeppni Íslands vegna sviptingar á titlinum Herra Ísland. Telur hann sig hafa misst vinnuna vegna þessa og orðið fyrir ærumeiðingum.

Ég segin nú bara eins og Ragnar Reykás hér forðum daga; Ma.., ma..., maður bara áttar sig ekki á svona vitleysu! Hversu gamalt þarf fólk eiginlega að vera til þess að átta sig á því að það þýðir ekki að kenna öðrum um eigin heimsku! Þarf fólk aldrei að horfast í augu við það að maður ber sjálfur ábyrgð á því sem maður tekur sér fyrir hendur og þarf að sama skapi að takast á við afleiðingarnar. Nú er ég engin sérstakur stuðningsmaður fegurðarsamkeppna og finnst eiginlega bara frekar glatað að keppa í fegurð - ég veit, ég veit, þetta er það sem við ljóta fólkið segjum alltaf ;) - en komm on, hversu mjög getur það verið mönnum til ærumeiðingar að vera sviptur titlinum þegar atvinna manns er almennur fávitaskapur í sjónvarpi!

Það getur vel verið að ég hafi rangt fyrir mér, kannski horfa atvinnurekendur á það hvort menn hafi hlotið eða verið sviptir titlinum Herra Ísland þegar kemur að því að velja menn í vinnu og láta það vera ráðandi þátt í því hvort viðkomandi hlýtur vinnuna eða ekki. Kannski hefur það engin áhrif á atvinnurekendur hvað menn aðhafast í sjónvarpsþætti eða í kjölfar þess að vera sviptir titlinum Herra Ísland. Kannski er ég bara bitur af því að ég var aldrei með í fegurðarsamkeppni ;)

Stundum verða menn að líta í eigin barm og takast á við afleiðingar eigin ákvarðana. Þannig er lífið bara.

En að öðru ... Laufey farin og maraþon lærdómur á dagskrá. Ekki frá því að það hafi hreinlega bjargað geðheilsunni að fá svona gott tækifæri til að líta upp úr bókunum í smá stund. Við létum rigninguna (og síðar slydduna) ekkert á okkur fá og þrömmuðum um bæinn svona til að sjá allavega það markverðasta ;) Kíktum á Aros listasafnið sem er algert möst fyrir alla sem koma til Árósa, röltum þar um í rólegheitum og skoðuðum listina. Hrossið, sem er í 50 krukkum ca., vekur alltaf jafn mikla athygli - Marilyn Monroe hans Andy Warhol og The Boy eru líka góð ástæða til þess að gera sér ferð. Út að borða á Grappa, frekar veðurbarðar og blautar í tærnar, og spjall fram eftir kvöldi toppaði svo daginn :)

Takk Laufey mín fyrir komuna (og fyrir hvítvínið, Kristalinn og þristana) og fyrir að bjarga mér frá próflestrinum :)

Lærdómspása

2007-01-17T17:32:00.000Z

Mjög svo mikil þörf á henni - alveg að mygla á lestrinum en ekki vegna þess að mér finnist efnið leiðinlegt heldur af því að það tekur mig aðeins lengri tíma að tileinka mér allan danska orðaforðan sem tilheyrir kúrsinum ... Akkúrat núna finnst mér ekki svo skynsamlegt að hafa valið að taka einn kúrs á dönsku og að ætla að þrjóskast við að taka prófið á dönsku þó svo að mér standi til boða að tala ensku í prófinu. En eins og svo oft áður þá er þrjóskupúkinn skynseminni yfirsterkari, ég get, ég vil, ég skal, ég ætla!

Laufey á leiðinni til mín - smá dítúr á leiðinni "heim" til Finnlands - og ég hlakka svo til að taka mér smá pásu frá barnaréttinum og njóta þess að hafa einn dag í að sýna henni allt það markverðasta hér í Árósum, spjalla yfir góðu hvítvínsglasi og þar fram eftir götunum. Spáir reyndar rigningu og stormi á morgun en við erum nú ekki víkingar fyrir ekki neitt og látum slíkt ekkert á okkur fá ;)

Annars lítið títt nema almennar pælingar um sumarið og haustið og lífið og tilveruna - tilvistarkreppan í hámarki en alveg að fást niðurstaða í þetta allt saman. Það er svo gott við próflesturinn að maður getur einbeitt sér að öllu öðru en lærdómnum og klárað svo ótrúlega mörg ókláruð mál - sem þó gætu vel beðið þangað til eftir próf ;) Mottó í próflestri: Aldrei að geyma það til morguns sem maður getur gert í dag - nema það heiti lestur eða lærdómur ;)

Home alone

2007-01-11T15:09:00.000Z

Þá er ég orðin ein í kotinu aftur. Þrátt fyrir að vera algerlega ósambúðarhæf þá verð ég að viðurkenna að það er nú bara hálf tómlegt að vera allt í einu ein eftir að hafa haft þetta frábæra fólk (í misstórum skömmtum þó) í heimsókn :) Takk Jóhann og Anna María fyrir komuna, þið björguðuð algerlega áramótunum :) Hlakka til að fá ykkur aftur sem allra fyrst ;)

Áramótin komu og fóru, Árósabúar gáfu Reykvíkingum ekkert eftir í "flugeldauppskjóti" sem var mjög hressandi eftir að jólaskreytingavonbrigðin ;) Að sjálfsögðu létum við okkur ekki vanta í bæinn á eftir og skriðum svo heim í ból undir morgun eftir ævintýralega heimferð. Nýjársdegi var svo eytt í sælgætis- og smákökuát yfir Sex and the City maraþoni við mikinn fögnuð bróðurs sem hefði örugglega ekki viljað eyða deginum öðruvísi ;)

Við Jóhann fórum svo til Svíþjóðar þann 3. janúar í heimsókn til Jóhanns Sigurðar, Önnu Ýrar, Tóta og Karitasar Guðrúnar. Það er eitthvað við það að koma til þeirra, það er allt svo hyggeligt og kósí og við höfðum það svo allt of gott. Frábær matur á hverju kvöldi að hætti húsfreyjunnar og gott spjall yfir Daimkaffi og súkkulaði (eða rauðvíni) gerði þetta að algeru eðalfríi. Aðalpersónur heimsóknarinnar voru náttúrulega gullmolarnir Tóti og Karitas Guðrún og var yndislegt að fá að knúsa þau aðeins og kreista. Elsku Jóhann og Anna, hjartans þakkir fyrir okkur, eins og alltaf var yndislegt að fá að gera hjá ykkur innrás.

Næst á dagskrá er að girða í brók og læra Børne- og ungdomsret af kappi, verður stemning að fá að taka eitt munnlegt próf á dönsku!

Búin að setja inn myndir frá Svíþjóðarferðinni undir Svíþjóð - surprise, surprise ;)

Áramót

2006-12-31T12:35:00.000Z

Árið 2007 á morgun, síðasti dagur ársins 2006 í dag - eins og svo oft áður hefur tíminn flogið áfram án þess að maður geri sér grein fyrir því. Árið hefur hins vegar verið mjög viðburðarríkt og gott og vonandi að árið 2007 haldi áfram á sömu braut.

Jólin búin vera yndisleg. Aðfangadagur var óvenjulegur en ég hefði ekki getað hugsað mér hann betri. Við borðuðum ofboðslega góðan mat eins og vera ber, spiluðum og kjöftuðum fram á nótt. Þó svo að það hefði örugglega verið gaman að fara heim um jólin (þar sem alltaf er best að vera) þá er ég alveg búin að sjá að jólin snúast ekki bara um hefðir og að allt sé eins og það hefur alltaf verið heldur miklu frekar um það að gera "heima" þar sem maður er í það og það skiptið. Að njóta þess að eiga óvenjuleg jól í stað þess að sakna jólanna sem maður hefur alltaf átt.

Martin, Þór og Áróra á aðfangadag

Jóladagur og annar í jólum einkenndust af bókalestri, Nóa Síríus (sem leyndist mér til mikillar gleði í einum jólapakkanna), smákökum, laufabrauði og malti og appelsíni. Alveg ótrúlega næs. Brugðum okkur reyndar að sjá Bond á annan í jólum - bara þrælgóður Bond og þrælflottur í kaupbæti ;)

Takk öll sömul fyrir jólakveðjurnar og jólakortin – gott að vita til þess að það er hugsað til manns í útlöndunum. Í tilefni þess hef ég sett inn myndir undir jól og áramót ef einhverjir vilja sá heimildarmyndir af herlegheitunum :)

Jóhann og Anna María mín komin og svo yndislegt að hafa þau :) Við Anna María erum búnar að hreinsa allverulega úr búðunum og fæturnir aðeins farnir að þreytast eftir margra klukkutíma þramm á strikinu. Karolina, vinkona mín frá Póllandi, kom svo í gær og verður hjá okkur um áramótin. Klikkuðum reyndar á því að kaupa flugelda þar sem þeir voru ekki seldir á strikinu ;) Vonum að dönsku kreppurnar séu ekki jafn sparsamar á flugeldana eins og þær eru á jólaskreytingarnar! Það er eitt hús í mínu hverfi sem er almennilega skreytt en jólaseríur sjást annars á stangli. Menn hafa hins vegar verið býsna ötulir við að sprengja síðan fyrir jól þannig að ég vona að við sjáum nokkra flugelda.

Engin áramótaheit komin á listann - tillögur vel þegnar í kommentin ;)

Gleðilegt nýtt ár!

Lille juleaften

2006-12-23T19:57:00.000Z

Þorláksmessukvöld og jólin bara á morgun. Búið að baka og skúra og gera og græja, allt klappað og klárt :) Skrýtið að vera ekki á þvælingi á Þorláksmessunni, ekkert jólatré við Kaupfélagið og engir jólasveinar með karamellur og epli í poka. Verður samt skrýtnast að fá ekki jólasvein inn að rúmi í fyrramálið - Glóan mín fékk þá reyndar alla leið upp í rúm í fyrra þessar elskur.

Lambalæri frá Nýja Sjálandi á matseðlinum annað kvöld með tilheyrandi kræsingum og að sjálfsögðu sendi mamma mér laufabrauð og malt og appelsín til þess að þetta verði nú fullkomið. Anna María mín búin að pakka niður í fjársjóðskistu öllu því sem var á óskalistanum mínum frá Íslandi þannig að nú tel ég bara niður þangað til hún og Jóhann koma. Held að jólin gætu bara hreinlega ekki orðið betri :)

Óska ykkur öllum gleðilegra jóla og farsældar á komandi ári. Vona að enginn fari í jólaköttinn og hlakka til að sjá ykkur sem flest á nýja árinu.

Jólakveðja frá Árósum

Mjaðmir ljúga ekki ....

2006-12-19T21:52:00.000Z

Ójá, það er staðfest og miðinn keyptur. Þann 9 mars 2007 verðum við, ég, Áróra og Lydia í Álaborg á tónleikum með Shakira :) Það eru ekki nema rétt um 10 ár (mögulega 11) síðan ég keypti mér Piez descalsos og mér finnst eins og það hafi verið í gær. Tónlistin hefur aðeins breyst, er orðin meira comercial en mjaðmir ljúga ekki og hún stórvinkona mín hún Shakira er "pura latina" og mikið rosalega verður gaman að "mover las caderas" við almennilega tónlist svona til tilbreytingar.

Hasta la vista beibís!

Einhvern tíman verður allt fyrst

2006-12-18T21:33:00.000Z

Hef ósjaldan haldið því fram að miðað við undirbúing fyrir próf þá sé stefnan tekin á 11. Það hefur nú meira verið gert til þess að peppa sjálfa mig og aðra upp í lærdómnum þegar myglan er orðin gríðarleg og nennan engin. Það hlaut því að koma að því að 11 yrði staðreynd í einkunnabókinni og merkilegt ef það var ekki bara í faginu sem ég taldi mig vera lélegasta í ;). Nú liggur leiðin bara upp á við, enda enn hægt að stefna á 13 ;)

Jólahreingerning á morgun, ekki seinna vænna þar sem "kettirnir" eru orðnir óvenju stórir miðað við árstíma ;) Svo er bara nægur tími til þess að njóta þess að jólin séu að koma - allt of langt síðan ég hef verið komin í jólafrí svona snemma. Ætla svoleiðis að gera ekki neitt, nema baka smákökur og svo er aldrei að vita nema maður skelli sér á jólamarkað í Den Gamle By, en þar er þessi mynd einmitt tekin

Allt að hafast

2006-12-16T10:16:00.000Z

Próf á mánudaginn, það síðasta fyrir jól. Í þetta skiptið (og í fyrsta skipti síðan sögur hófust) hef ég ákveðið að láta duga að lesa bara glósurnar enda ekki alveg tími til að lesa 600 bls. um höfundarétt sem á tíðum er bara fullur af tæknimáli og öll tækni komin frá hinum vonda. Ef ekki væri fyrir sjónvarpsútsendingar og internet þá væri lesefnið helmingi minna og á mun skiljanlegra tungumáli ;) Er annars að hugsa um að skella í mig eins og 2 bjórum fyrir prófið til þess að róa taugarnar og geta þá allavega ruglað mig út úr þessu ef svo skyldi fara að kunnáttan verði ekki upp á marga fiska ;)

Jólakort og jólagjafir farnar að streyma í Gulluland, nú vantar bara jólahreingerninguna og smákökubakstur til þess að jólin geti komið. Svindluðum reyndar aðeins og höfðum Christmas dinner á fimmtudaginn þar sem allir komu með einn rétt og jólapakka og svo var spilað upp á pakkana - sem hreinlega slógu í gegn, sumir þó meira en aðrir og þá sérstaklega forláta fjólublár klósettbursti! Það þarf sem betur fer lítið til þess að gleðja þessar elskur. Ég fékk hins vegar þessa dýrindis Bangsímon eldhúsklukku sem hlotið hefur heiðurspláss í höllinni.

Þar til næst, hafið það gott og farið varlega í jólastressinu :)

Magasár

2006-12-12T11:58:00.000Z

Hressandi að valda sjálfum sér og öðrum vonbrigðum í fyrsta prófinu ... náðist ... en ekki með tilætluðum árangri. Maður skyldi ætla að þegar maður er farinn að æla blóði sólarhringinn fyrir próf og löngu hættur að sofa í gegnum heila nótt, að maður gæti drullast til þess að koma því frá sér sem baráttan hefur snúist um síðustu vikur, sérstaklega þegar maður kann alveg efnið! En nei, það er greinilega ekki hægt að búast við því. Hver stjórnar þessu - ég bara spyr!

Próf, próf, próf

2006-12-10T20:12:00.000Z

Hún Stína mín elskulegust gerði mér kleift að sleppa lærdómnum í 10 mínútur með þessu snilldar "prófi". Það verður nefnilega að heita próf til þess að ég láti frá mér bækurnar, þvílíkur er áhuginn ;) Til þess að endurgjalda greiðann hef ég ákveðið að skella þessu hérna inn, vona Stína mín að ég nái að stytta þér aðeins stundirnar í próflestrinum ;)

Þið hin, ef einhver eru, megið endilega svara þessu líka :) Ykkur ber eiginlega skylda til þess þar sem ég er í próflestri og á svo agalega bágt vegna þess ;)

Koma svo, vera með!

1.Hvað er það fyrsta sem þér dettur í hug um mig ?

2. Hvaða lag minnir þig á mig?

3. Hvaða mynd minnir þig á mig?

4. Hver er fyrsta minningin þín um mig?

5. Hvaða dýr minni ég þig helst á og afhverju?

6. Er eitthvað sem þú veist ekki um mig og langar að vita ?

7. Höfum við djammað saman ?

8. Ætlarðu að setja þetta á þitt blogg svo ég geti svarað um þig ?

Heilsuátaki frestað um óákveðinn tíma

2006-12-09T19:41:00.000Z

Allavega fram yfir próflestur! mögulega aðeins lengur ;) Má bara alls ekki við að missa 3 tíma á dag úr lærdómnum en það tekur um það bil svo langan tíma að fara í ræktina. Hins vegar má ég vera að því að skoða sólarlandaferðir, blogg- og barnalandssíður og annað mjög svo áhugavert á veraldarvefnum!

Fór líka að spá í það að ég hef aldrei verið jafn vel á mig komin, heilsuátakslega séð, eins og þegar ég var að vinna í Zöru í Smáralind og þá borðaði ég twix í svo til öll mál og drakk kók. Til hátíðabrigða var djúpsteiktur kjúklingur og franskar úr Nóatúni ... nammi namm (eða þannig). Breytingar hafa því verið gerðar á mataræði undirritaðrar. Kók og súkkulaði verða nú aðaluppistaðan í fæðinu og kjúklingur (þó ekki djúpsteiktur) við sérstök tilefni!

Takk fyrir bless!

Lærdómur - þrældómur

2006-12-08T10:27:00.000Z

Mikið vildi ég óska að Glóan mín væri núna hjá mér, að kokka handa mér chilibuff og pico de gallo og til að sjá um að gera í mig fastar fléttur svo hárið þvælist ekki fyrir lestrinum :)

Bara 10 dagar eftir í lestri og 20 dagar þangað til Anna María og Jóhann koma til mín - þetta reddast, allt saman :)

It makes you think

2006-12-06T20:36:00.000Z

Alltaf gott að gera allt annað en að lesa fyrir próf - allt of fáar blaðsíður á lestrarlista dagsins en það reddast. Valnámskeið fyrir veturinn 2007-2008 hafa verið birt og mjög gleðilegt að ég get hugsað mér að taka 9 einingar á haustönn og 6 á vorönn! Spurning hvort maður sé á rangri hillu í lífinu ...

Heilsuátakið byrjar vel - 7 dagar búnir af desember og ég hef ekki enn farið í ræktina ;) Jibbíkóla!

Dekurhelgi að baki ...

2006-12-03T14:18:00.000Z

og formlegur próflestur hafinn :( Já tími jogginggalla, ullarsokka, matar sem elda má á 3 mínútum eða skemur er tekinn við með tilheyrandi þrifpásu - mér til mikillar gleði eða þannig ;)

Helgin hefur verið ljúf það sem af er. Lydia (sem var með okkur á dönskunámskeiðinu í ágúst) kom á miðvikudagskvöldið og fer aftur í dag. Við ákváðum að vera ekkert of aktívar í djamminu vegna próflesturs svo það var "girls night in" á föstudagskvöldið. Elduðum góðan mat og svo tók dekrið við - litun, plokkun og maskar og Nynne í tækið með tilheyrandi hlátrasköllum. Hún Nynne er danska útgáfan af Bridget Jones og alveg jafn misheppnuð ef ekki verri - Alveg nauðsynleg fyrir stelpukvöldin.

Í gærkvöldi átti nú aldeilis að lyfta sér aðeins upp í tilefni væntanlegrar einangrunar. Eftir margra tíma tilbúning var skundað á Social Club því þar er bjórinn fríkeypis milli 11 og 12 og kreppa mikil í gangi - ekki það að ég var bara í vatninu. Eini gallinn við Social Club er hins vegar að þar er meðalaldurinn ca. 18 ár og tónlistin er vægast sagt hörmung og ég segi það ekki bara af því að ég er orðin gömul! Ég gafst sem sagt upp kl. 12 og fór heim að sofa!

Nýjasta nýtt er að ég er komin í heilsuátak enn einu sinni en nú skal það takast - ég skal hunskast í ræktina alla daga í desember (nema prófdaga) og ég skal verða aftur mjó - gúdd bæjj hliðarspik og bingó!

Vetur, sumar, vor eða haust

2006-11-30T17:16:00.000Z

Það er ekki gott að segja til um hvaða árstíð er þessa dagana hér í Danmörku. Hitinn er alla daga um og yfir 10 gráður og ennþá lauf á trjám og runnum sem þrjóskast við að haldast þar. Lítur út fyrir að enn eitt hitametið verði sett hér í nóvember og sem dæmi um tíðarfarið hérna í Árósum má nefna að búið er að fresta opnum skautasvellsins við Musikhuset, um óákveðinn tíma, þar sem ekki er nógu kalt til þess að vatnið frjósi! Það er ekki eins og það sé desember á morgun ;)

Blessuð blíðan angrar mig þó reyndar ekkert enda lítið fyrir að hafa kaldar tásur. Væri nú ágætt samt að reyna að díla við þann sem öllu ræður og fá snjó 23. desember í nokkra daga - ég myndi alveg láta mig hafa það :)

Skiptinema í jólamatinn

2006-11-28T22:25:00.000Z

Já svona er fyrirsögnin á tölvupósti frá stúdentaráði sem mér var að berast. Nú hef ég aldrei smakkað skiptinema en maður veit aldrei ;) Samt pínu fegin að vera skiptinemi í Danmörku en ekki á Íslandi þessa stundina ;)

En að öllu gamni slepptu þá er þetta mjög gott framtak enda ætti enginn að vera einn á jólunum og örugglega mjög gaman fyrir erlenda skiptinema að fá að upplifa það hvernig við höldum upp á jólin.

Próflestur eða jólastúss ... það er spurningin

2006-11-27T15:00:00.000Z

Ætti að vera að lesa fyrir próf en er í staðinn að verða búin að skrifa öll jólakortin og pakka inn öllum jólagjöfunum. Aldrei slíku vant má fólk búast við því að fá jólakortin frá mér í fyrra fallinu en ekki á sjálfan aðfangadag eða jafnvel milli jóla og nýárs ;)

Var ánægð með að vera fyrst til að setja upp jólaseríur í hverfinu (allavega mínu næsta nágrenni) en það virðist vera sem daninn stressi sig ekkert á því frekar en nokkru öðru. Ég fer nú alveg bráðum að ná að tileinka mér þetta ligeglad viðhorf en á samt enn dálítið langt í land. Ekki það að það er mjög róandi að hengja upp IKEA kransana í staðinn fyrir það að vera með venjulega seríu. Lagði ekki í nokkra klukkutíma vinnu þar sem mæla þarf bil milli ljósa í glugganum með reglustiku ... og nei, ég hef ekki verki með þessu!

Keypti líka tilbúinn aðventukrans á laugardaginn, þ.e. það var búið að vefja grenið en átti eftir að skreyta, til að spara tíma þið vitið. Nema hvað að þegar að skreytingu kom þá fannst mér "vefjan" svo illa gerð að ég tók allt grenið af og gerði þetta upp á nýtt sem þýddi það að ég var enn lengur að þessu heldur en ef ég hefði bara keypt mér greni og gert þetta allt frá grunni. Maður á greinilega aldrei að stytta sér leið og ef hlutirnir eiga að vera almennilega gerðir þá á maður að gera þá sjálfur.

Fór að sjá United - Chelsea í gær, átti ekki alveg von á að labba inn á pöbb þar sem það var alveg eins og menn hefðu aldrei séð kvenmann áður. Þeir horfðu allir á mig strákarnir þegar ég kom inn (mögulega af því að það voru svona eins og 5 konur þarna) og svo þurfti ég að brjótast í gegnum þvöguna og leita að strákunum sem voru faldir lengst inni í horni þannig að ég ætlaði aldrei að finna þá. Bara vandræðalegt...

Anna María mín og Joe alveg að fara að koma til mín, bara 31 dagur þangað til :)

Jæja, ekki meira kæruleysi - drífa lærdóminn af svo ég geti farið í að klára jólagjafirnar. Ef einhver er sérfræðingur í International Copyright er þeim hinum sama velkomið að mæta í próf 18. desember fyrir mína hönd.

Sykurfíkn ... Maður spyr sig!

2006-11-22T15:55:00.000Z

Þegar maður vaknar þreyttur á Danmörku, náminu, rigningunni, vöðvabólgunni, strætó og fólki almennt eru góð ráð dýr. Ég ákvað að láta þetta ekki alveg eyðileggja fyrir mér daginn, skundaði í búð og fyllti körfuna af öllu sem mig langaði í þá stundina - súkkulaði, lakkrís, snakki, kóki, kexi og fleira góðgæti (gleymdi sem sagt öllu sem ég hafði lagt upp með að ætla að kaupa). Er nú búin að gúffa í mig eins og versti villimaður og langar mest til að henda restinni af draslinu í ruslið! En ef litið er á björtu hliðarnar þá kemur ógleðin alveg í veg fyrir það að ég velti mér upp úr sjálfsvorkun allavega næstu 6 tímana ;)

Þar til næst, hafið það gott og farið varlega í sælgætisátið :)

Let it snow, let it snow, let it snow

2006-11-20T09:39:00.000Z

Þó maður brosi nú dálítið út í annað vegna snjófrétta að heiman og hversu mjög snjókoma eftir miðjan nóvember virðist koma borgarbörnunum á óvart þá verður að viðurkennast að ég er nú pínu öfundsjúk. Myndirnar úr Skálagerðinu hjá Tótu og Höddu bara snilld og mig langar svo í snjó en ekki þessa endalausu rigningu. Við fengum nú reyndar smá snjó í október (eins og sjá má á myndinni) þannig að ekki má kvarta of mikið en það væri gaman að upplifa almennilegan snjó í Danmörku en Danir hafa það orð á sér að kunna enn minna að bregðast við snjónum en blessuð borgarbörnin og gengur það jafnvel svo langt að strætó keyrir ekki og verslunum er lokað vegna ófærðar. Merkilegt hvað ca. 30 cm. jafnfallinn snjór getur haft mikil áhrif ;)

Er annars að kljást við höfundaréttinn þessa dagana - því meira sem ég les því ruglaðari verð ég - stefnir í gott próf í desember!

Margar pælingar í gangi þessa dagana

2006-11-18T17:49:00.000Z

Afrakstur síðustu daga kominn upp á vegg og ég bara þokkalega sátt, þetta er allavega í áttina að því sem ég var að leita að. Búin að uppfæra myndirnar af íbúðinni minni þar sem má sjá hvernig þetta kemur út í heildina.

Og að allt öðru og alls óskyldu. Er að horfa á mjög átakanlega þátt þar sem foreldrar og aðstandendur bandarískra hermanna sem látist hafa í írak lesa nokkur af síðustu bréfum sem þeim bárust frá sonum sínum og dætrum. Þetta er svo fjarlægt manni og ég þakka fyrir að á Íslandi er ekki her þannig að við þurfum í fæstum tilvikum að ganga í gegnum það sem þetta fólk hefur gengið í gegnum. Í mörgum tilfellum eru þetta bara krakkar, 18, 19 og 20 ára. Þegar maður sér svona þætti skilur maður ekki hvernig er hægt að réttlæta þetta allt saman.

Ferðalög, ferðalög, ferðalög

2006-11-14T10:23:00.000Z

Loksins, loksins! Loksins hef ég frá mörgu skemmtilegu að segja og vonandi að einhverjir hafi þolinmæði til að lesa langlokuna á enda. Mikið búið að gerast í Gullulandi þessa dagana, Finnland, Rússland og Kaupmannahöfn heimsótt og svo komu mamma og pabbi í heimsókn til mín til Árósa.

Helsinki og St. Pétursborg:

Þriðjudagur 24. október:
Dagurinn byrjaði á því að ég þurfti að taka lestina á mjög svo ókristilegum tíma til þess að ná flugi upp úr hádegi. Það væri nú í sjálfu sér ekki mjög merkilegt nema fyrir það að tæplega miðja vegu til Kaupmannahafnar koma upp í lestina 3 ungir drengir klyfjaðir pinklum og setjast í sætin hinum megin við ganginn frá mér séð. Að sjálfsögðu voru þar íslendingar á ferð, enda engir aðrir sem geta troðið jafn miklu í töskurnar þegar halda skal heim. Þó það sé ljótt að hlusta á annarra manna samtöl þegar þeir hinir sömu vita ekki að maður er íslendingur þá hef ég ekkert samviskubit yfir því og þótti bara gaman að heyra hvað íslendingum fer á milli þegar þeir halda að það sé enginn nálægt sem skilur þá ;)

Laufey tók að sjálfsögðu á móti mér í Helsinki og eftir að hafa sett nýtt íslandsmet í að skipta um föt, greiða okkur og mála héldum við í þessa fínu laganemamóttöku í lagadeildinni í Háskólanum í Helsinki. Þar voru eðal veitingar í boði og gott hvítvín, hefðu ekki getað tekið á móti mér með betri hætti ;) Hef reyndar alltaf ætlað að koma því á framfæri við lagadeildina hér í Árósum að svona sé gert í Finnlandi og því hafi þeir vinninginn hvað varðar dekur við skiptinemana sína ;) Eftir móttökuna tók við mjög skemmtilegt en sérstakt kvöld sem endaði með kjötfarsborgara og frönskum.

Miðvikudagur 25. október:
Skoðunarferð um Helsinki með Laufey í fararbroddi. Ótrúlega margt að sjá og Helsinki sannarlega borg sem enginn á að láta fram hjá sér fara. Reyndar rosalega kalt þannig að við skoðuðum ekki allt en meðal þess sem kíkt var á var þinghúsið, National Museum (við nenntum reyndar ekki að fara inn þar sem að í gangi var sýning á hnífum og sveðjum og einhverju álíka spennandi), útivistarsvæði Helsinkibúa, Ólympíuleikvangurinn, óperuhúsið, höfnin og voða falleg kirkja sem ég því miður man ekki hvað heitir. Mexikóskur kvöldmatur kom yl í okkur aftur og svo var haldið heim til Laufeyjar í niðurpakk fyrir Rússlandsferðina.

Fimmtudagur 26. október:
Langt rútuferðalag (reyndar ekkert sértaklega langt á Þórshafnarmælikvarða) með tilheyrandi vegabréfsskoðunum og skemmtilegheitum einkenndi daginn en við komumst á leiðarenda fyrir rest og jafnvel fyrr en reiknað hafði verið með. Hótelið okkar var hið ágætasta og kom sér vel að það tók 10 mínútur (án gríns) að labba frá lyftunni að herberginu okkar og samviskubitið yfir því að dröslast ekki í ræktina algerlega óþarft.

Veitingastaðir með enskum matseðli komu mjög sterkir inn þegar haldið var út að borða en þar sem rússar nota kýrillískt letur upplifði ég mig í fyrsta skipti á ævinni sem ólæsa - mjög spes! Bátssigling á Neva ánni um kvöldið var frábær og gaman að sjá hversu mikill metnaður er lagður í að lýsa upp allar fallegu byggingarnar í borginni. Þegar komið var upp á hótel þótti okkur ekki síður áhugavert að sjá allar háklassa gleðikonurnar sitja í lobbyinu og bíða eftir að einhver hefði þær með sér upp. Fliss einkenndi hópinn sem tók lyftuna - án gleðikvennana - enda ekki allir vissir um hvernig bregðast átti við þessu menningarsjokki.

Föstudagur 27.október:
Menningardagur mikill og tók nokkra daga að meðtaka allt sem fyrir augu bar. Við byrjuðum á Hermitage safninu sem er í Vetrarhöllinni. Þar má sjá verk eftir alla helstu meistarana, Da Vinci, Micaelangelo, Rafael, Rembrant, Renoir, Picasso, Matisse, Cézanne, Gauguin og fleiri og fleiri. Ég hefði getað verið þarna í marga marga daga en við urðum að láta 4 tíma duga í þetta skiptið. Þá var brunað (ef hægt er að tala um 25 km á 2 tímum sem brun) í Katrínarhöllina og hún skoðuð í krók og kima, eða svona næstum. Höllin var nær eyðilögð í síðari heimsstyrjöldinni og gaman að sjá hversu vel hefur tekist til við að endurgera hana að því leyti sem það er búið. Til að toppa daginn var svo haldið á balletsýningu - Fountain of Bakhchisarai - í Mariinski leikhúsinu. Gæsahúðin sem gerði vart við sig strax í byrjun hvarf ekki fyrr en eftir að komið var upp á hótel.

Laugardagur 28.október:
City tour á dagskrá í byrjun dags. Kirkjur og minnismerki á meðal þess sem skoðað var, misnákvæmlega þó. Fórum inn í Saint Peter and Saint Paul cathedral þar sem grafir allra keisara og keisaraynja Rússlands er að finna. Skoðuðum að sjálfsögðu hvar Romanov fjölskyldan hvílir en "merkilegasta" gröfin, gröf Dagmarar danaprinsessu, sem færð var til St. Pétursborgar á dögunum var girt af þar sem verið var að leggja lokahönd á verkið og því ekki hægt að skoða hana. Herskipið Aurora var svo næst á dagskrá, þótti það nú bara svona passlega lítið merkilegt miðað við allt annað sem við vorum búnar að skoða. Skoðunarferðinni lauk svo með Savior on the Spilled Blood Church sem er ótrúlega falleg kirkja sem reist var í minningu Alexanders II Rússlandskeisara, akkúrat á þeim stað þar sem hann var myrtur. Mósaíkmyndirnar í kirkjunni er hreint út sagt stórkostlegar og að mínu mati eitthvað það allra fallegasta lsem við skoðuðum í ferðinni.

Eftir Skoðunarferðina var haldið á minjagripamarkaðinn þar sem Laufey fór hreinlega á kostum í prúttinu og þolinmæðinni þar sem Guðlaugu gekk ekki allt of vel að finna Matryoshku (við köllum þær nú reyndar babúskur í minni sveit) sem hæfði heimili hennar og voru margir hringir labbaðir um markaðinn í leitinni þar til sú rétta fannst. Prófuðum rússneskt kaffihús og létum ekki okkar eftir liggja í að prófa eitthvað rússneskt af matseðlinum.

Um kvöldið var haldið í rússneskan kvöldverð á veitingahúsinu Red Matryoshka. Mjög góð súpa í forrétt og svo kjöt í brúnni sósu og kartöflustappa í aðalrétt, öllu skolað niður að rússneskum sið - þ.e.a.s. með vodka. Lét nú reyndar ekki hafa mig út í svoleiðis vitleysu, enda ekkert fyrir þessar fylleríssamkomur og áfenga drykki ;) Við Laufey héldum okkur því bara við bjórinn. "Live" rússnesk þjóðlagatónlist vakti mikla lukku og endaði með því að við stöllur keyptum eitthvað voða fínt hljóðfæri sem ég hef ekki hugmynd um hvað heitir en gefur frá sér mjög svo góðan hávaða.

Metro Nightclub var næsta stopp og mjög sérstök upplifun. Þessi líka fíni næturklúbbur á 3 hæðum, á fyrstu er Rússnesk danstónlist, á annarri er karókí og hip hop og á þriðju er eins og lítill bíósalur til að horfa á klámmyndir og svo dansgólf þar sem olíubornir karlmenn á g-streng dansa uppi á svölum! Aldurstakmarkið inn er 15 eða 16 ára þannig að þetta líktist helst skólaballi og hækkuðum við meðalaldurinn all svakalega. Mér fannst reyndar kostur að barirnir voru ekki á miðju dansgólfinu heldur aðeins fyrir utan þannig að fólk gat setið og kjaftað, þ.e.a.s. ef maður fattaði reglurnar um að maður þarf að bíða eftir borði þangað til röðin kemur að manni - sæi það í anda heima á Íslandi ;) Fólk var heldur ekkert að reykja eða að drekka á dansgólfinu sem aftur leiddi til þess að hægt var að dansa en ekki tipla á glerbrotum og fötin komu öll heil heim. Þetta var mjög svo áhugaverð þjóðfélagsrýni en ekki skemmtilegasti staður sem ég hef komið á. Unofficial taxi tekinn heim á mjög svo skikkanlegum tíma og þá kom sér vel að hafa Laufeyju í samningaviðræðunum um verð.

Sunnudagur 29. október:
Komið að því að halda heim á leið. Við stoppuðum við Mannerheim línuna við þorpið Summa og skoðuðum byrgi frá því Rússar og Finnar áttu í stríði um landamærin milli landana. Stríðið varð Rússum til mikillar skammar sökum mannfalls en lyktaði engu að síður með því að landamæri landanna eru nú 200 km frá St. Pétursborg en voru áður um 50 km frá.

Súpermarkaðsstopp til vodkakaupa fyrir áhugasama var svo það síðasta sem gert var áður en haldið var aftur yfir landamærin.

Mánudagur 30. október:
Einkenndist af rólegheitum og smá lærdómi (ekki of miklum þó). Við kíktum aðeins í bæinn í nokkrar búðir en ekkert keypt (mjög léleg afköst). Laufey töfraði svo fram dýrindis kjúklingapastarétt sem voru gerð góð skil ásamt góða hvítvíninu. Jóhanna, tutorinn hennar Laufeyjar, stóð svo fyrir Sex and the City maraþoni ásamt Cosmopolitan um kvöldið.

Þetta var alveg frábær ferð og ég er svo ánægð með að mér hafi boðist að fara með. Takk Laufey fyrir frábæra viku - Mi casa es tu casa ef þig langar einhvern tíman að koma til Árósa :)

Kaupmannahöfn og Árósar

Það kom að því að settið brygði undir sig betri fætinum og kæmi að heimsækja frumburðinn í Danmörku. Að sjálfsögðu skall á óveður og máttu þessar elskur bíða í 12 tíma á Keflavíkurflugvelli og millilenda í Glasgow áður en þau komust til Köben. Ég nýtti daginn hins vegar í að fara á Strikið - það verður nú einhver að sjá til þess að búðirnar fari ekki á hausinn! Ótrúlega gott að sjá þau loksins og áttum við alveg frábæra viku sem verður vonandi endurtekin í vor.

Pabbi varð fimmtugur mánudaginn 6. nóvember og fórum við með hann í mini skoðunarferð um borgina, hádegismatur á Nýhöfn, Amalienborg, St. Alban's Church og Litla hafmeyjan meðal þess sem við sáum. Fórum svo í glæsikvöldverð á Kong Hans Kælder og fengum þar einhvern þann allra besta mat sem ég hef fengið á veitingahúsi um ævina. Staðurinn hefur 1 Michelin stjörnu og vel að henni kominn.

Héldum heim til Árósa á þriðjudeginum, eftir smá stopp í nokkrum búðum ;) Tókum því svo bara rólega um kvöldið enda allir frekar ferðaþreyttir.

Latínuhverfið kom sterkt inn í bæjarskoðunarferðinni, enda einstaklega skemmtilegt hverfi. Við röltum mikið um bæinn án þess að vera með niðurnjörfaða dagskrá. Fengum steik á Hereford á föstudagskvöldið sem var alveg dásamlega góð og góð tilbreyting frá kjúklingnum ;) Kíktum svo á írska pöbbinn, Tir Na Nóg, en þar var lifandi tónlist og mikil stemning.

Heimsóttum Den gamle by á laugardeginum. Hafði ekki gert mér í hugarlund að það væri svona gaman að koma þangað. Ótrúlega mikið af gömlum fallegum húsum og sýningar inni í þeim sem sýna gamla tíma og flestar ótrúlega flottar. Búið var að koma upp jólaskreytingum, þ.e. setja upp jólatré í mörg húsin og skreyta húsin að innan. Eitt húsana er nýtt í almennar sýningar og var þar m.a. hægt að sjá sýningu á skýrnarkjólum frá um 1700 og til 2006, sýningu um jól í manna minnum og sýningu á gömlum jóladagatölum. Vakti upp mikla nostalgíu hjá mömmu og pabba að sjá þetta allt saman - ég mundi reyndar ekki eftir miklu enda svo mikill unglingur ennþá ;)

Settið fór svo heim á sunnudaginn, komst með flugi alla leið til KEF án teljandi vandræða og sitja núna veðurtept í Reykjavík - já það er sko ekki tekið út með sældinni að eiga börn í Danmörkinni!

Nú er svo komið að því að opna þarf bækurnar og hefja undirbúning fyrir próf - til að koma í veg fyrir of mikinn lestur þá keypti ég striga og málningu og er byrjuð að mála! Var mjög skrýtið fyrst enda ekki tekið upp pensil síðan í VMA en var nokkuð fljót að komast í gang. Vonandi að útkoman verði upphengjanleg ;)

Jóhann Hafberg og Anna María eru búin að bóka ferð út um áramótin. Hlakka ekkert smá til að sjá þau :) Við Áróra erum að plana "munaðarleysingjajól" en það verður voðalega notalegt að fá þau Jóhann og Önnu Maríu til að fagna áramótunum með okkur. Við Jóhann ætlum svo yfir til Svíþjóðar til Jóhanns og Önnu eftir áramótin, aðeins að fá að knúsa þau og spilla börnunum :)

Held ég láti þetta gott heita í bili, tekur allavega viku að komast í gegnum lesturinn ;) Búin að setja inn myndir frá Helsinki og Pétursborg, set rest inn á næstu dögum.

Hasta la próxima!

Draumar og annað skemmtilegt

2006-10-22T10:01:00.000Z

Hafiði séð eitthvað jafn krúttlegt. Svona voru þeir nú einu sinni sætir og stilltir þeir Jóhann Þór, Pétur og pabbi minn :)

Af mér er lítið að frétta, hef verið í lærdómi alla vikuna, að vinna upp það sem ekki hefur verið lesið í vetur og tryggja næstu viku þegar ég verð í Finnlandi og Rússlandi :) Hef því átt mjög rólega daga en í staðinn haft mikið að gera við það að dreyma alls kyns rugl og vitleysu á næturnar. Hef vaknað svo dauðþreytt síðustu 4 daga þar sem það er svo mikið að gera hjá mér í draumunum!! Reyndar ekki jafn slæmt og þegar ég var í Zöruævintýrinu og var oft búin að taka utan af sænginni minni og brjóta saman þegar ég vaknaði eða jafnvel búin að skipta um náttföt, enda veit það hver heilvita maður að maður lætur nú ekki standa sig að því að vera í sömu náttfötunum kvölds og morgna ;)

Áhugavert samt, að þó ekki hafi verið mikið vit í öllum þessum draumum mínum þá dreymdi mig að ég væri komin aftur heim á Þórshöfn í nótt. Veit ekki hvort það er af því að ég hef ekki komið heim í svo alltof langan tíma (4 dagar um síðustu jól teljast varla með) en allavega þá labbaði ég um allt þorpið mitt og heilsaði öllum sem á vegi mínum urðu, bara eins og í gamla daga. Þurfti svo að tékka á því hvort það væri ekki allt eins og það á að vera, öll hús á sínum stað, fótbolti útá velli, unglingarnir í sjoppunni og sjómennirnir niðri á bryggju. Vaknaði í einhverju nostalgíukasti og sé dýrðina og dásemdina alveg í rósrauðum bjarma ;)

Flug til Finnlands á þriðjudaginn og svo Rússland á fimmtudaginn. Með Laufey sem leiðsögumann í Helsinki getur þetta bara ekki klikkað. Laganemamóttaka og Sauna komið á dagskrána en svo á að "play it by the ear" - finnst það svo miklu meira spennandi en að hafa niðurnjörfaða dagskrá allan tíman :) Er að farast úr spenningi akkúrat núna.

Mamma og pabbi koma svo eftir 2 vikur og ekki seinna vænna en að fara að plana allt sem þau verða að sjá í fyrstu ferð, eins gott að þau láti sjá sig oftar en einu sinni á einu ári!

Sorry for the later, I lost the street

2006-10-16T13:16:00.000Z

Klárlega setning helgarinnar, sögð með sterkum ítölskum hreim og tilheyrandi handahreyfingum ;) Fíflagangur mikill einkenndi helgina og var hún vægast sagt hreinasta snilld.

Fyrir þá sem vilja fá formlega ferðasögu þá hefst nú lesturinn:
Eftir að hafa farið í rúmfatalagerinn eldsnemma á föstudagsmorgni í svefnpokaleiðangur og svo í tíma þar á eftir, var skundað niður á Hovedbanegård og lestin tekin til Álaborgar. Karolina tók á móti mér á lestarstöðinni og eftir að hafa labbað alla 100 metrana heim til hennar var boðið upp á dýrindis lasagne, reyndar svolítið útlitsgallað en við dæmum náttúrulega ekki eftir útlitinu. Fórum svo "to the street" eða á "götuna" eins og það er kallað í Álaborg, en það er gaman að segja frá því að þar er heil gata með diskótekum og börum allt á sama staðnum og mikil stemning um helgar. Hittum þar fullt af Ítölum og fleiri kreisí útlendingum, þræddum nokkra staði og dönsuðum þangað til kl. 6 um morguninn. Þetta var hin besta skemmtun, liðið svona nett kærulaust og skemmtilegt, mikið hlegið og mikið tekið af myndum eins og vera ber.

Vöknuðum svo um kl. 10 á laugardagsmorgun og drifum okkur út að skoða bæinn, ekki hægt að fara til Álaborgar heila helgi og segjast bara hafa séð "götuna"! Við löbbuðum útá höfn og fórum svo á "götuna" að fá okkur hádegismat. Fannst það dálítið vandræðalegt að að allt í kringum okkur sátu danir sem voru vel í því kl. 3 á laugardagseftirmiðdegi og við voða rólegar og dannaðar eins og alltaf ;)

"Leggjan" var svo mjög velkomin rétt fyrir kvöldmat og sváfum við í allavega 2 tíma áður en Karolina töfraði fram þennan dýrðlega pólska pastarétt (já, það var eins og ég væri drottning miðað við hversu mjög var stjanað við mig). Eftir matinn héldum við svo í partý á Luna Kollegiet með alþjóðlegu félagi vitleysinga ;) Þar voru leiknir drykkjuleikir af miklum móð og sungnar drykkjuvísur þegar leið á kvöldið ;) Fórum svo á "götuna" aftur, eftir langa leið frá kollegi-inu. Svolítið erfitt þegar three amigos fá að ráða ferðinni, stökkva yfir grindverk til að prófa rólur og rennibrautir, klifra upp um allt, faðma ljósastaura og syngja drykkjuvísur ;) Já, það var stemning! Allavega þá fundum við "the street" á endanum og líkt og á föstudagskvöldið var dansað fram undir morgun.

Sunnudagurinn byrjaði rólega en endaði svo á "Chinese Dinner" sem 2 kínverjar sem eru með Karolinu í hóp í skólanum stóðu fyrir. Þvílíkt flottur matur, súpa í forrétt og svo 4 aðalréttir sem voru geðveikt góðir þrátt fyrir að koma svolítið spánskt (jafnvel kínverskt) fyrir sjónir í fyrstu. Þau útskýrðu fyrir okkur þá hefð í Kína að gestgjafinn skálar við hvern og einn við borðið og þeir drekka saman (ef maður drekkur ekki þá er það móðgun við gestgjafann) og svo er góður siður fyrir hvern og einn gest að "drekka tilbaka" með gestgjafanum, þ.e. þakka fyrir sig og skála fyrir lífinu ;) Fórum svo að sjálfsögðu niður í "afþreyingarherbergið" og spiluðum borðtennis enda ekki annað hægt þegar gestgjafarnir eru kínverjar. "Fussball" borðið vakti líka mikla lukku þrátt fyrir að keppnisskapið hafi gripið um sig eins og við má búast þegar "fótbolti" er annars vegar. Var svona stemning eins og á opnu húsi í gamla daga í Grunnskólanum á Þórshöfn, held meira að segja að ég hafi ekki spilað borðtennis síðan þá en hef greinilega engu gleymt og fór hreinlega á kostum í hælaskónum og pilsinu ;)

Kom svo tilbaka í morgun, þreytt en ánægð með frábæra helgi. Í næstu viku er það svo Finnlandsför og ég get hreinlega ekki beðið. Verður bara gaman að hitta Laufeyju mína og sjá hvernig hún hefur það í Finnlandinu, svo ekki sé talað um Rússlandsferðina sem við erum búnar að hlakka til að fara í síðan skólinn byrjaði.

Jæja, bækurnar lesa sig víst ekki sjálfar! Fyrir þá sem eru ekki löngu búnir að gefast upp á að lesa þá setti ég inn nýjar myndir undir Álaborg :)

Ferðalög

2006-10-12T18:54:00.000Z

Helgin átti að vera svo róleg, lærdómsmaraþon mikið á dagskrá enda prófdagsetningarnar komnar og það sem enn betra er prófspurningarnar að hluta komnar í hús. Sýnist allt stefna í jólafrí frá 18. desember og svo eitt próf í byrjun eða lok janúar. Voðalega "hyggeligt" allt saman. En aftur að helginni ... Allt í einu og á ca. korteri er búið að plana ferð til Álaborgar í heimsókn til Karolinu sem var með mér á dönskunámskeiðinu í ágúst. Þarf því að drífa í niðurpakki, kaupa svefnpoka og læra að það þarf ekki allt að vera niðurneglt með löngum fyrirvara ;)

Svo er alveg að líða að Finnlandsför og er spennan vægast sagt orðin gríðarleg. Það er eitthvað svo skemmtilegt við það að fara til landa sem maður hefur aldrei komið til áður, allt eitthvað svo ferskt og spennandi. Sýnist líka á blogginu hennar Laufeyjar að Finnarnir kunni sko alveg að skemmta sér ;)

Mamma og pabbi eru svo á leiðinni í byrjun nóvember og ætla að vera í viku. Það verður svo gott að fá þau og það er svo margt sem mig langar að sýna þeim, er ekki viss um að vika sé nóg fyrir þetta allt saman en þá er bara kominn góð hugmynd að vorfríi ;)

Stefnir allt í frábæra skemmtun næstu vikurnar og þá loksins hef ég kanski frá einhverju skemmtilegu að segja .... Hasta luego ;)

Nýjar myndir

2006-10-08T16:50:00.000Z

Var að setja inn nýjar myndir í septemberalbúmið og bætti líka við nokkrum undir ágúst 2006 en ég fékk svo skemmtilegar myndir hjá Áróru sem ég mátti til með að deila með ykkur fáu sem leggið það á ykkur að fylgjast með hvað er að gerast í Gullulandi ;)

Eins og sjá má af síðustu færslu var ég komin mjög seint/snemma heim í nótt/morgun ;) Var svona nett frosin þegar ég kom heim og nokkuð víst að næst fer ég heim í næturstrætó en ekki fyrsta strætó á sunnudagsmorgni. Hér loka síðustu staðirnir kl. 6 á morgnanna og það er nú svo merkilegt með Danina að hálftíma fyrir lokun hringja þeir bjöllu til merkis um að síðustu drykkirnir skuli nú pantaðir og svo slökkva þeir á tónlistinni!!!! Það er náttúrulega bara argasti dónaskapur!! Af hverju ekki bara að hafa opið til kl. 5.30 ... þegar ég fer að stjórna í Danmörku ... þá breyti ég m.a. þessu! Það er svo efni í nýtt blogg hversu "klárir" Danirnir eru í bisness og almennri stjórnsýslu ;)

En af gærkvöldinu er það að segja að við hittumst nokkur í heima hjá mér áður en við kíktum í bæinn. Að sjálfsögðu fengu allir Ópalskot við misjafnar undirtektir (Christjan þótti það vægast sagt viðbjóður). Fórum svo í troðfullum strætó niðrí bæ - virðist sem allir skiptinemar bæjarins hafi ákveðið að taka sama strætó og við - það er náttúrulega ekki venjulegt hvað við erum vinsæl ;) Svo var bara tekinn góður rúntur á hina ýmsu staði, mikið dansað, mikið kjaftað og mikið blikkað, pizza og svo strætó heim eld snemma því að sjálfsögðu var ekki stemning fyrir því að taka síðasta næturstrætó heim kl. 3.

... Að djamma, fram á nótt...

2006-10-08T05:45:00.000Z

Þegar það er betri hugmynd að bíða í 50 mínútur eftir fyrsta strætó úr bænum á sunnudagsmorgni heldur en að standa í leigubílaröðinni, er kominn tími fyrir gamlar konur að endurskoða þessar bæjarferðir! Guði sé lof fyrir flíspeysur og lopasokka ...

Allt að gerast

2006-10-04T07:33:00.000Z

Matarboð hjá mér í gærkvöldi. Hittumst stelpurnar úr dönskubekknum mínum og borðuðum saman og svo fór hluti á Studenterhus á International Night. Gaman að sjá að í svona ólíkum hópi þá hafa samt allir eitthvað til málanna að leggja og allir hafa frá einhverju áhugaverðu að segja. Verð að viðurkenna að þetta var betra en ég átti von á.

Studenterhus var bara eins og venjulega - fullt af útlendingum ;) En það var mjög fínt og gott að komast út og kjafta við annað fólk en maður gerir venjulega.

Stefnir allt í partý hjá mér um næstu helgi. Mikið plan í gangi og gaman að sjá hvort það gengur eftir ;)

Líka gaman að segja frá því að ég er búin að panta mér flug til Finnlands í lok október. Ætla að fara að heimsækja Laufey í Helsinki og svo ætlum við að fara í 4 daga ferð til Pétursborgar. Laufey greyið fær að sjá um allar reddingar í sambandi við ferðaplön og vegabréfsáritun. Þetta er því farið að virðast raunverulegt sem er eins gott því ég get ekki beðið - það er líka svo fullt af afþreyingu í boði í ferðinni að maður verður eiginlega hálf ruglaður af því að velja á milli.

Einbeitningarskortur.is

2006-10-02T14:15:00.000Z

Búin að ná að lesa 15 blaðsíður í allan dag! Einbeitningin bara ekki til staðar en miklar aðrar pælingar í gangi ;) Arg... sumir dagar eru bara ekki mínir dagar.

Matarboð hjá mér annaðkvöld. Stelpurnar sem voru með mér í bekk á tungumálanámskeiðinu ætla að koma í International Dinner - Það ætti að verða áhugavert.

Maður spyr sig

2006-09-30T07:32:00.000Z

Héraðsdómur Reykjavíkur dæmdi í gær mann í 4 mánaða skilorðsbundið fangelsi fyrir líkamsárás á heimili fyrrum sambúðarkonu sinnar. Mun maðurinn hafa slegið hana hnefahögg í höfuð og líkama svo að hún féll í gólfið og misþyrmt henni með öðrum hætti með þeim afleiðingum að hún fékk kúlu á hnakka, mar á bak við hægra eyra og bólgnaði á eyranu, bólgnaði og marðist í andliti, marðist yfir rifjum vinstra megin og á báðum handleggjum.

Þetta vakti athygli mína við lestur dómsins:
„Þegar [A] var kynntur framburður ákærða um sömu atburði sagði hún einfaldlega að hann væri í stöðugri afneitun og þætti henni verst að hann skyldi ekki sýna meiri iðrun. Þau hefðu engu síður tekið upp sambúð að nýju í apríl síðastliðnum, í kjölfar áfengismeðferðar ákærða og hefði hann ekki bragðað vín síðan. Sambúðin gengi vel, en því miður hefði aldrei mátt ræða umrædda atburði eða annað ofbeldi, sem hann hefði beitt hana í fyrri sambúð. [A] taldi dvöl sína í Kvennaathvarfinu þó hafa orðið til þess að ákærði gæti ekki eytt öllum staðreyndum strax, kennt henni um hvernig farið hefði og allt farið í fyrra horf í samskiptum þeirra. Í framhaldi var [A] spurð um afstöðu sína til refsingar á hendur ákærða og kvaðst hún ekki vilja að hann hlyti fangelsisdóm, heldur aðeins að hann gerði sér grein fyrir því hvert stendi ef hann héldi svona áfram. Þá kvaðst hún ekki vilja fá dæmdar bætur úr hendi ákærða.“

Get ekki annað en velt því fyrir mér hvort öll umræðan um heimilisofbeldi og væntanleg breyting á hegningarlögunum komi til með að skila einhverju. Hversu lengi ætla konur að trúa því að menn sem hafa gengið í skrokk á þeim í fjölda skipta séu allt í einu breyttir og ekki til í þeim ofbeldi. Mögulega er það hægt en ég væri ekki til í að taka sénsinn!

Annað sem ég velti fyrir mér er hvort höfðun dómsmáls sé allt í einu orðin leið til þess að kenna mönnum lexíu. Maður spyr sig.

Í sól og sumaryl

2006-09-25T20:51:00.000Z

Hef komist að því að geggjað veður og lærdómur getur vel farið saman :) Fór með Áróru og Ásgeiri Karli á ströndina í gær, þar lágum við eins og fínar frúr með öl í annarri og bókina í hinni á meðan Ásgeir tíndi steina og veiddi marglyttur - við vorum hins vegar ekki alveg jafn spenntar fyrir marglyttunum eins og gefur að skilja ;)

Sat svo í dag á svölunum heima hjá mér og las í blankalogni og um 30 stiga hita (í sól þ.e.a.s.). Gamla meira að segja komin með smá lit og marglyttan sést ekki - allavega ekki í bráð! Fór svo að hitta Áróru og Ásgeir þar sem Áróra fór að sækja bílinn sinn í Norrænu og ég átti alveg 30 kg. tösku í þeim eðalvagni. Ótrúlegt hvað hægt er að koma miklu dóti fyrir í einum bíl og vorum við alveg að tapa okkur í upppakkelsi (nýtt orð!) og fagnaðarlátum yfir því hvað leyndist í töskunum (maður getur nú ekki alveg munað hverju maður pakkaði niður fyrir 2 mánuðum síðan).

Setti inn myndir undir september 2006 - reyndar ekki margar en eitthvað er betra en ekkert ;) Fer vonandi að bæta úr því en ferðaplön eru í fullum gangi. Álaborg, Skövde, Helsinki, Pétursborg, Skagen og Kaupmannahöfn eru efst á blaði. Miklar spegúleringar eru í gangi hvort ég lifi af kuldann í Montréal í janúar en á bara eftir að skoða hvort fjármagn sé til fyrir slíkri ferð. Langar svo að heimsækja Gaby mína og Luis og að sjá litla Luka sem ég hef bara aldrei hitt en þar sem ég hef gerst sjálfskipuð "tia" þá fylgja því ákveðnar skyldur sem flestar fela það í sér að ofdekra molann :) Afleggjari af peningatré óskast, þarf að vera í góðu standi og gefa vel af sér ;)

Merkilegt nokk

2006-09-23T09:26:00.000Z

Fer að líða að því að ég hafi verið hérna í Danmörkinni í 2 mánuði en mér finnst eins og ég hafi alltaf verið hérna og langar ekkert að fara aftur heim til Íslands. Væri svo til í að taka restina af mastersnáminu mínu hérna úti en verð þó að viðurkenna að kúrsarnir sem kenndir eru í HÍ eru meira við mitt hæfi þó það séu líka fínir kúrsar hérna og kennslan er mun betri hér en í lagadeildinni heima (með of fáum undantekningum). Það eru því miklar pælingar í gangi þessa dagana um hvað ég ætli mér eiginlega að gera við lífið.

Gamall draumur um að gerast sjálfboðaliði í Mið-Ameríku eða Afríku hefur líka verið að láta á sér kræla en vonandi að ég nái að halda honum í skefjum þangað til ég á peninga til þess að láta slag standa - þetta er ekki lengur spurning um hvort heldur hvenær.

Lífið gengur sinn vanagang og allt að komast í rútínu sem gæti þótt frekar leiðinleg en mér finnst ágæt. Kúrsarnir mínir eins og áður sagði frábærir, þó merkilegt að kúrsinn sem ég var spenntust fyrir - The UN Human Rights System - olli smá vonbrigðum á meðan International Copyright er að koma mjög sterkur inn og gott betur en það. Børne- og ungdomsret er svo þarna mitt á milli og væri mun skemmtilegri ef ég gæti tekið meiri þátt í tímum. Það er bara ekki alveg mín sterkasta hlið að tala dönskuna, sem mér finnst ég ekki nógu góð í, fyrir framan 30 dani. Þó mér fari fram í hverri viku þá fer það óendanlega í taugarnar á mér að ég skuli ekki geta talað fullkomlega - einn þolinmæðisskammtur óskast sendur með DHL sem fyrst!

Annars er gaman að segja frá því að við Áróra erum byrjaðar í ræktinni af fullum krafti. Fitness DK niðrí miðbæ varð fyrir valinu og er aðstaðan þar öll eins og hún gerist best og vonandi að það skili sér í kílóatapi sem er orðið mjög nauðsynlegt eftir lifnaðarhætti síðustu 2 mánaða ;)

Jæja, ekki hægt að vera alltaf að slæpast, børne- og ungdomsret bíður mín í sólinni á svölunum.
Vil minna á að það er enn yfir 20 gráðu hiti hér í Danmörku og stefnir allt í að það haldist næstu daga. Marglyttusyndrómið er á undanhaldi og vonandi að það komi aldrei aftur!

ARG

2006-09-19T10:26:00.000Z

Er stundum á því að það hljóti að vera einhver þarna úti sem er svakalega illa við mig! Ég er sem sagt búin að vera að klára vegabréfsáritunarumsóknina mína til Rússlands þannig að mér verði nú hleypt inn í landið í lok október. Fannst það rosalega sniðugt að fylla umsóknina út í Acrobat Reader og prenta hana svo út og þá væri bara eftir fyrir mig að kvitta.... Mjög góð hugmynd nema hvað að þegar ég er komin með prentarann, búin að tengja hann rétt (ég veit nefnilega hvar leiðslurnar eiga að vera!) og komin í stellingar til að prenta skjalið út - þá kviknar ekki á helv... prentaranum!!! Ég gæti öskrað en er að hugsa um að sleppa því vegna þeirrar nýju stefnu að vera yfirleitt til stakrar prýði og fyrirmyndar. Og til þess að toppa þetta allt saman þá er byrjað að rigna aftur!

Annars hefur stemningin verið góð og hún kemur til með að haldast góð um leið og mér tekst að laga prentarann sem mér skal takast að sjálfsögðu.

Glóan mín á afmæli í dag, er orðin 22 ára skvísan. Til hamingju með daginn engillinn minn. Te quiero mucho.

Settið á leiðinni í bæinn

2006-09-16T12:40:00.000Z

Reyndar ekki fyrr en í nóvember en það verður að fara í að finna handa þeim hótel í Kaupmannahöfn því þar ætlum við að vera fjóra fyrstu dagana eftir að þau koma. Er búin að vera að skoða og skoða hótel og það er víst óhætt að segja að það sé af nógu að taka. Ég var á mjög fínu gistiheimili þegar ég var í Köben í fyrra þannig að ég veit ekkert um hótelin þarna - ef einhver er vel að sér í hótelgæðum í Kaupmannahöfn þá er sá hinn sami vinsamlega beðinn um að láta mig vita ... med det samme ;)

Allt gott að frétta eins og alltaf. Fór út að borða með Binna, Lindu og Hrannari í gær á Ítalíu og var það að sjálfsögðu rosalega gott. Ekki síðri Ítalía hér heldur en heima ;) Svo kíktum við aðeins á Fatter Eskil en ég var nú samt bara komin snemma heim enda mikill lærdómur bókaður um helgina.

Allavega, bækurnar lesa sig víst ekki sjálfar en ef þið þekkjið eitthvað til í Köben þá endilega látið mig vita (við erum ekki að leita að dýrustu hótelunum, bara eitthvað fínt og vel staðsett og þá erum við glöð).